УИХ өнгөрсөн долоо хоногт Монгол Улсын Засгийн газар болон Монгол, Францын хамтарсан "Бадрах Энержи" ХХК-ийн хөрөнгө оруулагч Орано Майнинг С.А.С компани хооронд байгуулах хөрөнгө оруулалтын гэрээний төслийг зөвшилцөн дэмжсэн. Ингэснээр хөрөнгө оруулалтын гэрээнд гарын үсэг зурах боломж бүрдсэн юм. Үүний дагуу өнөөдөр хөрөнгө оруулалтын гэрээнд гарын үсэг зурахаар төлөвлөсөн. Энэхүү гэрээ нь Оюутолгойн гэрээний дараа орох томоохон хөрөнгө оруулалтын гэрээ юм.

27 жилийн өмнөөс ярьж эхэлсэн ураны төсөл хэрэгжүүлэх асуудал Францын Ерөнхийлөгч Эммануэл Макрон манай улсад албан ёсны айлчлал хийсэн үеэс хойш эрчимтэй урагшилсаар өнөөдөр хөрөнгө оруулалтын гэрээгээ байгуулж албан ёсоор эхлүүлэх гэж байна.

Төслийн анхны хөрөнгө оруулалтын хэмжээ 500 сая доллар бөгөөд гэрээ хүчин төгөлдөр болох өдрөөс хойш дөрвөн жилийн хугацаанд хийх юм. Хөрөнгө оруулалтын гэрээнээс онцлох зохицуулалтуудыг танилцуулъя.

• Засгийн газар болон хөрөнгө оруулагч талд ногдох шууд үр өгөөжид тооцох орлогыг тусгайлан дурдаж, хэрэв Монголын талын шууд үр өгөөж 51 хувьд хүрэхгүй тохиолдолд Хөрөнгө оруулагч болон Төсөл хэрэгжүүлэгч компани нь үр өгөөжийг 51 хувьд хүргэхэд шаардлагатай үр өгөөж тохируулах нэмэлт төлбөрийг Засгийн газарт нөхөн төлөх үүрэгтэй.
• Хөрөнгө оруулагчийн зөвхөн аж ахуйн нэгжийн орлогын албан татвар, НӨАТ, АМНАТ, Гаалийн тариф гэсэн дөрвөн төрлийн татварыг тогтворжуулна. Байгаль орчны салбарын албан татварыг тогтворжуулахгүй.
• Төсөл хэрэгжүүлэгч компани нь Дорноговь аймгийн Засаг дарга, Төсөл хэрэгжих Улаанбадрах сумын Засаг даргатай гурван талт хамтын ажиллагааны гэрээ байгуулж, орон нутгийн хөгжлийг дэмжинэ.
• Төсөл хэрэгжүүлэгч хамтын ажиллагааны гэрээний хүрээнд бүтээн байгуулалтын үе шатанд орон нутагт 300 мянга, уурхайн ашиглалтын үе шатанд нэг сая, уурхайн хаалтын үе шатанд сая нэг 100 мянган ам.долларын хөрөнгө оруулалт хийнэ.
• Уурхайн ашиглалтын үе шатанд төсөл хэрэгжүүлэгч компанийн нийт ажилчдын 90 ба түүнээс дээш хувь нь Монгол Улсын иргэн байна.
• Төсөл хэрэгжүүлэгч компани нь уурхайн ашиглалтын үе шатанд нийт туслан гүйцэтгэгчдийн 60 хувиас доошгүй, жилийн нийт худалдан авалтын үнийн дүнгийн 40 хувиас доошгүй нь Монгол Улсад бүртгэлтэй, татвар төлөгч хуулийн этгээд байна.
• Хөрөнгө оруулалтын гэрээг 20 жилээр байгуулж, гэрээг тодорхой шаардлагыг хангасан тохиолдолд хуульд заасан хугацаагаар сунгана.

УИХ Хөрөнгө оруулалтын гэрээний төслийг хэлэлцэн дэмжсэний дараа ажлын хэсгийн дарга Б.Пүрэвдорж гишүүн "Энэхүү гэрээг байгуулснаар Франц, Англи, Итали, Испани, Белги, Нидерланд, Швейцарь зэрэг Европын холбооны 26 улсын гуравны нэгийг 50 жилийн турш цахилгаанаар хангах боломжийг нээж өгч байгаа.

Хоёрдугаарт, дэлхийн дулаарал, хүлэмжийн хийн ялгаралтай тэмцэж буй тэмцэлд манай улс том хувь нэмэр оруулах алхам боллоо.

Гуравдугаарт, Монгол Улс уран олборлосон туршлага дээрээ үндэслэн цаашид атомын цахилгаан станц барих боломжийг нээж байна" гэсэн юм.