Америкийн дуучин Тейлор Свифт ням гарагт болсон “MTV Europe Music Awards-2024” хөгжмийн наадмаас “Шилдэг уран бүтээлч”, “Америкийн шилдэг уран бүтээлч”, “Шилдэг амьд үзүүлбэр”, мөн “Fortnight” дуугаараа “Шилдэг клип” шагналуудыг хүртлээ.

Одоогоор “Eras” аялан тоглолтынхоо хаалтын тоглолтуудыг хийж байгаа Т.Свифт шагнал гардуулах ёслолын үеэр дүрс бичлэгээр дамжуулан шүтэн бишрэгчдэдээ талархал илэрхийлжээ.

Их Британийн Манчестер хотноо болсон шагнал гардуулах ёслолыг Америкийн дуучин Бенсон Бун “Beautiful Things”, “Slow it Down” дуугаараа эхлүүлсэн байна. Тэрбээр мөн “Шилдэг шинэ уран бүтээлч” төрөлд өөрийн анхны “MTV EMA”-ын цомыг хүртжээ.

Өмнөд Африкийн шинэ залуу уран бүтээлч Тайлагийн хувьд “Африкийн шилдэг уран бүтээлч”, “Шилдэг R&B уран бүтээлч” зэрэг гурван төрөлд шагнал хүртсэн байна. Тэрбээр Манчестерийн тайзнаа өөрийн хит “Water” дуу болон “Push 2 Start” хэмээх шинэ дуугаа  үзэгчдийн хүртээл болгожээ.

Тус наадмыг түүхэндээ хамгийн олон буюу гурав дахь удаагаа хөтлөн явуулж буй Британийн дуучин Рита Ора өнгөрсөн сард Аргентины нийслэл Буэнос-Айрес хотод тагтнаас унаж нас барсан “One Direction” хамтлагийн гишүүн Лиам Пейний дурсгалыг хүндэтгэсэн байна.

Америкийн хип-хопын домог Баста Раймс “EMA”-ын “Дэлхийн шүтээн” шагналыг гардан авсан бөгөөд тэрбээр уран бүтээлийн гараагаа эхлүүлснээс хойших 34 жилийн хугацаанд “MTV”-гээс хүртсэн анхны шагнал энэ болж байгааг онцолжээ.

Мөн наадмын үеэр үзэгчдийн сэтгэлийг хөдөлгөсөн үзүүлбэр үзүүлсэн Канадын дуучин Шон Мендес “Канадын шилдэг уран бүтээлч”-ээр шалгарсан байна. Харин Америкийн дуучин Сабрина Карпентер “Espresso” хит дуугаараа “Шилдэг дуу” шагналыг хүртсэн бол Ариана Гранде “Шилдэг поп уран бүтээлч” төрөлд, Эминем “Шилдэг хип-хоп уран бүтээлч” төрөлд тус тус шалгарлаа.