TV-9 телевиз өчигдөр орой товлосон эфирээ таслан байж Н.Энхбаярын ярилцлагыг цацав. Эхлэл нь Монгол Улсын Ерөнхийлөгчөөр ажиллаж байсан хүний хувьд Монголын нийгэм, улс төрд сүүлийн үед өрнөж байгаа үйл явдалд байр сууриа илэрхийлэх гэсэн ерөнхий утгатай байсан ч үнэн хэрэгтээ бүхэлдээ Ц.Элбэгдоржийг “хог” болгон харагдуулах зорилготой ярилцлага байв. Товчхондоо экс Ерөнхийлөгч Н.Энхбаярын яриа Ерөнхий сайд Л.Оюун-Эрдэнийн Ц.Элбэгдоржийг намнах ажиллагаанд хүч нэмэгдүүлэх оролдлого болов.

Энэ нь  “С.Зоригийн амь насыг хөнөөснөөс хэдхэн хоногийн дараа Сүхбаатарын талбайд болсон цуглааны үеэр “сахал” Б.Билэгт “С.Зоригийг М.Энхсайхан тэргүүтэй хүмүүс алсан” гэж зарласан. Ингэж хэлсэн Б.Билэгтийг Ц.Элбэгдорж дагуулаад явсан. Тэр үед би Ц.Элбэгдоржийн даалгавараар Б.Билэгт ингэж хэлснийг шууд ойлгосон” хэмээн тэртээ 1998 онд болсон үйл явдлыг тоймлон ярьснаас нь тодорхой харагдана.

Мөн Н.Энхбаяр ардчиллын алтан хараацайнуудын нэг гэгддэг Ц.Элбэгдоржийг “Ардчиллын дайсан” хэмээн тодотгож, түүнийг “Монголд тахир дутуу ардчиллыг бий болгож байна” хэмээн буруутгав.

Монголын улстөрчид сонгууль бүрийн өмнө ялалт, эрх ашгийн төлөө нэгнийхээ “бөгс”-ийг ухаж, хэн нэгнийг “ардын дайсан” болгодог уламжлалтай. Энэ уламжлалынхаа дагуу экс Ерөнхийлөгч Ц.Элбэгдоржийг адгийн харагдуулах ажиллагаа төрийн өндөр түвшинд эрчимтэй явагдаж, хуучин удирдлагыг ч татан оролцууллаа. Үр дүн нь чухал.

Энэ бүхний эцэст С.Зоригийн амь насыг хэн хөнөөсөн, хэн захиалсан гэх асуултад үнэн зөв хариулт гаргаад ирвэл алга ташъя. Харин өнөө л сонгуулийн өмнө С.Зориг гэсэн нэрийг автор болгон ашиглаад хаявал Л.Оюун-Эрдэнэ “ах” нараасаа ялгагдахгүй нэгэн гэдгээ шууд харуулна.

Сонгууль хаяанд байна. Ирэх өдрүүдийн улс төр илүү элдэвтэй, эрчтэй явагдах нь тодорхой. 

Б.Хэрлэн