УИХ-ын 2024 ээлжит сонгуульд оролцох нам, эсвэл, бие даагчид дэвшүүлж буй мөрийн хөтөлбөртөө Үндэсний аудитын байгуулагаар дүгнэлт гаргуулдаг хуулийн заалттай. 

Үүний дагуу хуулийн хугацаанд 27 нам, хоёр эвсэл мөрийн хөтөлбөрөө ҮАГ-т хүргүүлсэн. Харин аудитын байгууллага хуульд нийцсэн эсэхийг энэ сарын 10-ны дотор дүгнэж, шаардлага хангаагүй мөрийн хөтөлбөрийг засварлуулахаар нам, эсвлүүдэд мэдэгдэх зохицуулалттай.

Тэгвэл ҮАГ 27 нам, хоёр эвслийн мөрийн хөтөлбөрийг хуулийн шаардлага хангаагүй хэмээн газрын орлогч дарга Д.Загджав генерал буцаасан байна. Тодруулбал, намуудын мөрийн хөтөлбөр аудитын босго давж чадаагүй "бүдэрчихжээ". Тиймээс сонгуульд оролцохоо мөрийн хөтөлбөрөө хүргүүлсэн, хөтөлбөр нь буцсан нам эвслүүд даруй буюу энэ сарын 17 хүртэлх хугацаанд хөтөлбөрөө засварлаад дахин хүргүүлэх ёстой. Харин бие даан нэр дэвшигчид мөрийн хөтөлбөрөө энэ сарын 22-24-нд ҮАГ-т хүргүүлэх хуулийн зохицуулалттай.  

Яагаад намуудын мөрийн хөтөлбөрийг бүгдийг нь хүлээж аваагүйгээ орлогч Д.Загджав тайлбарлахдаа  “Монгол Улсын эдийн засгийн урт хугацааны зорилтыг, бодлогыг хангах чиглэл рүү хандуулах учиртай. Эдийн засгийн тооцооллуудыг үзсэн. Зарим нэг засч залруулах ёстой зүйлүүд байгаа юм. Тэр бүгдийг тодотгоод явуулсан манай саналыг нам эвслүүд эргэж хараад 17-ны өдөр ирүүлнэ” гэжээ. 

Харин ямар нам эвсэл 2024 оны сонгуульд орохыг "намын" гэх тодотголтой албан тушаалын "наймаатай"  Д.Загджав генерал мэдэхүү. Магадгүй эрх баригч нам цаашлаад байгууллагынх нь эрх ашигт нийцээгүй хөтөлбөр байх юм бол хөөрхөн "шоглочихож" мэдэх нь ээ. Ямар нэг шалтгаанаар бүдрүүлээд, сонгуульд оролцуулах боломжгүй болгочих вий гэсэн хардалт явагдаж эхэлжээ.