Сүхбаатар дүүргийн анхан шатны шүүхийн гадаа Зариг.мн сайтын эрхлэгч, сэтгүүлч Н.Өнөрцэцэгийн өмгөөлөгч О.Батсүх мэдээлэл хийлээ. Тэрбээр "Баасан гарагт НПГ-аас миний үйлчлүүлэгч Н.Өнөрцэцэгийг сэтгүүлчийн мэргэжлийн үйл ажиллагаа явуулахыг нь түдгэлзүүлэх саналыг шүүхэд гаргасан байсан. Шүүхээс хэргийг хянаж дуусах хүртэл хугацаанд сэтгүүлчийн мэргэжлийн үйл ажиллагаа явуулахыг түдгэлзүүлэх шийдвэр гаргасан. Үүнтэй өмгөөлөгч миний бие санал нийлэхгүй байна. Хуульд заасны дагуу тус шүүхийн ерөнхий шүүгчид гомдол гаргаж байна. 

Миний үйлчлүүлэгчийн хувьд төрийн албан хаагч биш. Ямар нэгэн эрх мэдэл албан тушаал хашдаггүй хүн. Хоёр сар гаруйн хугацаанд цагдан хоригдсон. Түүнээс хойш өнөөдрийг хүртэл гэрээс гарахыг нь хязгаарласан. Зорчих эрхийг нь хүртэл хязгаарласан. Прокуророос хоёр санал гаргасан. Нэгдүгээрт Зариг.мн сайтын эрхлэгчээр ажиллахыг нь түдгэлзүүлээрэй. Үүнийг шүүх хүлээж аваагүй. 

Хоёрдугаарт сэтгүүлчийн мэргэжлийн үйл ажиллагааг түдгэлзүүлэх санал байсан. Миний үйлчлүүлэгчийн фэйсбүүк орчинд бичсэн пост шэйр хийсэн мэдээллийг танилцуулсан. Өөрийнх нь бичсэн шэйрлэсэн мэдээллүүд шалгагдаж байгаа хэрэгтэй хамаагүй юм. 

Шүүхээс гарч байгаа шийдвэрийн агуулга хэдий Н.Өнөрцэцэг гэж хүнд хамаарах ч цааш цаашдаа хэвлэл мэдээллийн эрх чөлөө хүний үг хэлэх эрх чөлөөнд хязгаарлалт тавьсан буруу жишгийг тогтоох учир би гомдлоо гаргасан" гэв.