Улсын хэмжээнд өнөөдрийн байдлаар 6 сая толгой мал хорогдоод байна. ОБЕГ-ын Эрсдэлийн удирдлагын газрын тооцоогоор 20 орчим сая мал хорогдох тооцоог хийгээд байна. 20 орчим сая мал хорогдвол 20 000 малчин өрх малынхаа 70-аас дээш хувийг алдах, бүр малгүй болох эрсдэлтэй байна.

Тиймээс Засгийн газар малжуулах хөтөлбөрийг хоёр үе шаттайгаар хэрэгжүүлнэ.

ХНХЯ-ны дэргэдэх Хөдөлмөр эрхлэлтийг дэмжих санд 107 тэрбум төгрөгийн эх үүсвэр бий. Үүнээс малгүй болсон иргэдийн малжуулах бодлогоор урт хугацааны, хүүгүй 5-8 сая төгрөгийн зээл олгоно" гэсэн мэдээллийг ЗГХЭГ-ын дарга Д.Амарбаясгалан өглөө.

Үүнээс гадна Засгийн газраас МАА-д ирж байгаа цаг уурын өөрчлөлтийн нөлөөллийг сөрөн давах хөтөлбөрийг хэрэгжүүлэхээр УИХ-д хуулийн төсөл өргөн барихаар шийдвэрлэсэн байна. Нэг удаагийн шинжтэй уг хуулийн төслийг нэн яаралтай горимоор хэлэлцүүлэхээр ирэх долоо хоногт УИХ-ын өргөн мэдүүлэх аж.