Шинэ Хархорум хотын хөгжлийн Ерөнхий төлөвлөгөөний үзэл баримтлал боловсруулах олон улсын нээлттэй сонгон шалгаруулалт зарлалаа.  Энэ талаар Ерөнхийлөгчийн зөвлөхүүд болон Хархорум хотын бүтээн байгуулалтын захиргаанаас мэдээлэл хийв.

Ерөнхийлөгчийн Соёл, шашны бодлогын зөвлөх Д.Бум-Очир “1220 онд Чингис хаан зарлиг гаргаж, Хархорум хотыг байгуулах санаачилга эхэлсэн. Энэ хотыг Өгөдэй хааны үеэс эхлэн байгуулж, Гүе, Мөнх хаан тэргүүтэй Монгол бусад хаад энэ үйл хэргийг үргэлжлүүлсэн.

Чингис хааны энэ зарлигийг Монгол Улсын Ерөнхийлөгч энэ цаг үед үргэлжлүүлж, биелүүлж байгаа хэрэг юм. Чингис хааны итгэл үнэмшил, үзэл баримтлалыг энэ цаг үед амьдарч байгаа монголчууд бид үргэлжлүүлэх нь яах аргагүй журамт үүрэг. Тиймээс бид Эзэн Богд Чингис хааныхаа захиас, зарлигийг биелүүлж, энэхүү хотыг барих учиртай.

Тухайн цаг үедээ Хархорум хот дэлхийн нийслэлийн хэмжээний том хот байсан. Дэлхийн түүхэнд тодоор бичигдэж үлдсэн энэ газраа, түүнийхээ нэр хүндийг сэргээж, олон улсад сурталчлах чухал үйл хэрэг бий” гэдгийг хэлэв.

Шинэ Хархорум хотын бүтээн байгуулалтын асуудал хариуцсан захиргааны Хөрөнгө оруулалт, хамтын ажиллагааны хэлтсийн дарга Г.Дарханчулуун “Хархорум хотыг сэргээн байгуулах тухай Ерөнхийлөгч зарлиг гаргаснаас хойш 16 сарын хугацаа өнгөрч байна.

Энэ хугацаанд шинэ хот байгуулах байршлыг ТЭЗҮ-ийг хийж дууссан. Орхоны хөндийн хаана Хархорум хотыг байгуулах тухай нарийвчилсан ТЭЗҮ хийгдэж, Засгийн газрын шийдвэрээр 189 000 га талбайг улсын тусгай хэрэгцээнд авсан.  Газрыг тусгай хэрэгцээнд авснаар Хархорум хотын хөгжлийн Ерөнхий төлөвлөгөөг нарийвчлан боловсруулах эрхзүйн орчин бүрдсэн.

Шинэ хот байгуулах байршил нь ЮНЕСКО-гийн дэлхийн өвд авсан байршилтай хил залгаа оршдог, эртний түүхэн хотуудын тууриуд байдаг учраас түүх, археологийн эрдэмтэн, судлаачидтай хамтран ажиллаж, хот байгуулалтын нэгдсэн мэдээллийн санг үүсгэсэн.

Шинэ хотын байршил дээр одоо инженер геологийн нарийвчилсан судалгаа, байрзүйн 2000 маштабтай зураглалын ажил хийгдэж байна. Мөн археологийн хайгуул, байгаль орчны нарийвчилсан үнэлгээний ажил хийгдэнэ" гэсэн мэдээллийг өглөө. 

Нээлттэй сонгон шалгаруулалтад дотоод, гадаадын хот төлөвлөгч нар оролцох боломжтой. Бүртгэлийн хугацаа өнөөдрөөс эхлэн нэг сарын хугацаанд үргэлжилнэ. Бүтээл ирсний дараа оролцогчдын бүтээлээр үзэсгэлэн гаргаж, иргэдийн саналыг авах юм байна.

Сонгон шалгаруулалт нийтдээ 1.6 тэрбум төгрөгийн төсөвт өртөгтэй бөгөөд нэгдүгээр байр 750 сая төгрөгийн шагнал сантай байна.