Дөрвөн жилийн өмнө нийслэлчүүд Д.Сумъяабазар тэргүүтэй нийслэлийн МАН-ынханд итгэл хүлээлгэн сонгосон. Одоогоор нийслэлд нийслэлийн ИТХ-ын нийт 45 төлөөлөгчийн 34 нь МАН-ынх байна. Тэд сонгуульд оролцохдоо Улаанбаатар хотын замын түгжрэлийг арилгах тухай ямар амлалт өгч байсныг сануулъя 

Түгжрэлгүй хот

ШИЙДЭЛ 1. Олон төрөлт, орчин үеийн ухаалаг тээврийн сүлжээг бий болгоно.

• Нийтийн тээврийн үйлчилгээний автобусны парк шинэчлэлтийг олон улсын стандартад нийцүүлэн хийж гүйцэтгэнэ.

• BRT систем зэрэг багтаамж ихтэй зорчигч тээврийн төрлийг нэвтрүүлнэ.

• Агаарын дүүжин замын тээврийн төсөл хэрэгжүүлж, зориулалтын зогсоол, дэд бүтцийг барьж байгуулна.

• Таван шараас Офицеруудын ордон хүртэлх цахилгаан соронзон тээврийн бүтээн байгуулалтыг эхлүүлнэ.

• Сургуулийн хүүхдэд зориулсан тээврийн хүчин чадал, үйлчилгээний хүрээг өргөтгөн, шинэ менежмент нэвтрүүлнэ.

• Төр, хувийн хэвшлийн хамтын түншлэлийн хүрээнд хотын такси тээврийг хөгжүүлэх төсөл, хөтөлбөр хэрэгжүүлнэ.

• Шинэ хотуудыг холбосон багтаамж ихтэй нийтийн тээврийг нэвтрүүлнэ.

• Зорчигч тээврийн үйлчилгээний дамжин суулт хийх нэгдсэн терминал, зогсоолуудыг барьж байгуулна.

• Тээврийн хэрэгслийг цахилгаан болон хийн эх үүсвэрээр цэнэглэх сүлжээг өргөтгөнө.

ШИЙДЭЛ 2. Гудамж замын даац, нэвтрүүлэх чадварыг нэмэгдүүлнэ.

• Улаанбаатар хотын авто замын мастер төлөвлөгөөг баталж үе шаттай хэрэгжүүлнэ.

• Хотын авто замын сүлжээг өргөтгөн сайжруулах, шинэ суурьшлын бүс болон гэр хорооллын гол гудамж замыг өргөтгөн, хатуу хучилттай, явган замтай  болгох  ажлыг үе шаттай хэрэгжүүлнэ.

• Одоо байгаа хатуу хучилттай авто замыг шинэчилж, өргөтгөнө.

• Хөдөлгөөний нягтрал ихтэй байршилд явган хүнд зориулсан гүүрэн болон нүхэн гарц байгуулна.

• Давхар зогсоолын  тоог нэмэгдүүлж, авто зогсоолын менежментийн боловсронгуй тогтолцоог бий болгоно.

• Хотын гол болон туслах гудамж замын уулзвар, төмөр замын гарам  дээгүүр гүүрэн гарц барих ажлыг эхлүүлнэ.

• Авто тээврийн товчоодын байршлыг оновчтой болгож, зорчигч тээврийн тав тухтай нөхцөлийг бүрэн хангасан, авто терминалын үйлчилгээг нэвтрүүлнэ.

• Ачаа тээвэр, түгээлтийн шөнийн үйлчилгээнд шинэлэг менежмент  нэвтрүүлнэ.

• “Дугуйн зам” хөтөлбөрийг үргэлжлүүлж, стандартын дагуу тохижилт, гэрэлтүүлэг бүхий дугуйн замын шинэ сүлжээ байгуулж, дугуйн зогсоолын дэд бүтцийг өргөжүүлнэ.