Засгийн газрын хуралдаанаас гаргасан шийдвэрийг холбогдох сайд нар болон албан тушаалтнууд танилцуулж байна. 

 Улаанбаатар хотын сүүлийн 20 жилийн газар олголт, газрын хувьчлал, нийтийн эзэмшлийн гудамж, зам, талбайд газар олгосон нь хууль зөрчсөн эсэх, мөн нийтийн тээврийн асуудлаар нээлттэй, нийтийн сонсгол хийх,  УИХ-ын даргад хандаж Түр хороо байгуулах чиглэл ХЗДХ-ийн сайд Б.Энхбаярт өгсөн байна. 

Энэ талаар тэрбээр  "Засгийн газрын өнөөдрийн хуралдаанаар асуудлыг нэлээд өргөн хүрээнд авч хэлэлцлээ. Нэг удаагийн асуудал Улаанбаатар хотод давтагдах эрсдэл өндөртэй. Зун үер болсон, нийтийн тээврийн асуудал, дугаарын хязгаарлалт, ирэх даваа гарагаас ЕБС-ийн амралт дуусна, дугаарыг хязгаарлалтаар хөдөлгөөнд оролцох хугацаа дуусна. Ирэх долоо хоногоос эхлэн тэг зогсолт руу орно. Улаанбаатараас өөр хот дотроо аюултай ачаа бараа тээвэрлэдэг хот байхгүй. Бүр хот дотроо төмөр замаар аюултай тээвэрлэлт хийдэг. Үүнийг шийдвэрлэхээр тойрог замын асуудал ярихаар газрын асуудал хөндөгдөнө. 

Улаанбаатар хот дарьтай торх болж хувирсан байна. Нийтийн тээвэр, утаа, газрын асуудал нь бүгд авлига дээр очиж байна. Хэн ч гарч ирээд шийдэх боломжгүй түвшинд хүрсэн байна. Иймээс  өнгөрсөн 20 жилийн газар олголт, нийтийн тээврийн асуудлыг парламентын түвшинд хянан шалгаж, иргэд олон нийтийг мэдээллээр хангах, нотлох баримтыг шинжлэн судлах Сонсгол зохион байгуулах Түр хороо байгуулж, ХЗДХ-ийн сайд ахалж ажиллах үүрэг даалгаврыг Ерөнхий сайд өгсөн" гэлээ.