Засгийн газрын өчигдрийн хуралдаанаас сайд асан Ц.Нямдоржийн хүү Анхбаярыг Монгол Улсаас Нэгдсэн Үндэстний Байгууллагын дэргэд суух Байнгын төлөөлөгчөөр томилуулах саналыг гаргасан юм. Н.Анхбаярын хувьд 2020 оны долоодугаар сараас эхлэн Гадаад харилцааны яамны Төрийн нарийн гэх төрийн өндөр албан тушаалыг хашиж буй. Харин одоо Монгол Улсаас Нэгдсэн Үндэстний Байгууллагын дэргэд суух Байнгын төлөөлөгчөөр томилогдох "виз" мэдүүлээд байна. Аав нь төрд насаараа өндөр албан тушаал хашсан бол хүү нь ч мөн төрийн өндөр албан тушаалд ногоон гэрлээр заларсаар одоо НҮБ-ын төлөөлөгч болохоор боллоо. 

Ийнхүү аавынхаа адил төрийн өндөр албан тушаалыг тасралтгүй хашиж байгаа Н.Анхбаярын хувьд аавынхаа нэгэн адил  хөрөнгө орлогын мэдүүлгээсээ орон сууцаа хасчээ. Хэдэн жилийн өмнө Сайд асан Ц.Нямдорж байргүй, түрээсийн байранд толгой хоргодож байгаа тухайгаа ярьж олон нийтийн нүдийг орой дээр нь гаргасан. Гэвч тухайн үедээ хүүхдүүдийнх нь нэр дээр тансаг зэрэглэлийн байшингийн байдаг тухай мэдээлэл цацагдсан. 

Тэгвэл Ц.Нямдоржийн хүү Анхбаяр өнгөрсөн 2022 онд мэдүүлсэн ХОМ дээрээсээ орон сууцаа хассан байна. Үүнээс өмнө тэрбээр хоёр орон сууц, нэг зуслангийн байшинтай хэмээн хөрөнгө орлогоо мэдүүлж байсан ч орон сууцаа хассан байна. Тодруулбал, 2018 оноос хойших хөрөнгө орлогын мэдүүлэг дээр түүний нэр дээр хоёр орон сууц бүртгэлтэй байна. Үүн дээр нэмэгдээд хоёр гражтай. Эдгээрийн нийт үнэлгээ нь 367 сая төгрөг байв. Харин одоо бол Н.Анхбаярын гэдэг айлынх 270 сая төгрөгийн үнэлгээтэй нэг зуслангийн байшин, нэг гражтай.

Тэрбээр таван жилийн өмнө буюу Гадаад яамандаа газрын захирал хийж байхдаа гэр бүлээрээ жилийн 40 гаруй сая төгрөгийн орлоготой байсан бол сүүлд хөрөнгө орлого мэдүүлэхдээ гэр бүлээрээ жилийн 90 сая төгрөгийн олж байгаагаа мэдүүлсэн байна. Н.Анхбаярынх Lexus RX 350, Toyota Highlander гэсэн хоёр машинтай. Хачирхалтай нь өнгөрсөн таван жилийн туршид хөрөнгө орлогын мэдүүлэгтээ энэхүү хоёр машины марк хийгээд үнэлгээний дүн өөрчлөгдөөгүй байна. Мөн тэдний 20 ямаа, 50 хонины тоо ч огт өөрчлөлтгүйгээр ХОМ-т бичигдсэн байна. 

П.ГОО