Сонгуулийн чимээнээр зарим албан тушаалтнууд ажлаа өгч, сонгуулийн ажилдаа ороод байна. Хуулийн дагуу Төрийн албан хаагч он гарахаас өмнө үүрэгт ажлаа хүлээлгэн өгсөн байх ёстой. 

Энэ дагуу шинэ оны өмнө дарга нар ажлаа өгөх өргөдлөө бичлээ. Тэдний нэг нь “Монголын хөрөнгийн бирж” ХК-ийн Гүйцэтгэх захирал Х.Алтай. Түүний хувьд 2016 оны намар “Монголын хөрөнгийн бирж” ХК-ийн Гүйцэтгэх захирлаар томилогдож байв. Тэгвэл энэ хугацаанд түүний хөрөнгө орлого хэрхэн нэмэгдсэн талаарх мэдээллийг хүргэе. 

Х.Алтай нь “Монголын хөрөнгийн бирж” ХК-ийн Гүйцэтгэх захирлаар томилогдоод нэг жилийн дараа өөрөө жилийн 24 сая төгрөгийн орлоготой, гэр бүлийн гишүүд нь 44 сая төгрөг олдог тухай мэдүүлжээ. Тухайн үед буюу 2017 онд Х.Алтай захирал 310 сая төгрөгийн үнэлгээтэй 4 орон сууцтай, 50 сая төгрөгийн үнэлгээтэй Nissan, Terrano маркийн машинтай хэмээн мэдүүлж байжээ. Мөн дансандаа 62 сая төгрөгтэй хэмээн мэдүүлж байжээ. Тэгвэл үүнээс гурван жилийн дараа буюу гурван орон сууц, нэг зуслангийн байшинтай хэмээн мэдүүлсэн ба эдгээрийн үнэлгээ ТЭРБУМ төгрөгт хүрсэн байна. Нэг үгээр гурван жилийн дотор үл хөдлөх хөрөнгийн үнэлгээ ГУРАВ ДАХИН нэмэгдсэн гэсэн үг юм. Хамгийн сонирхолтой нь дээрх хугацаанд түүний болон гэр бүлийн гишүүн жилийн орлогод онц өөрчлөлт ороогүй ч эрхэм захирлын үл хөдлөх хөрөнгийн үнэлгээ ийнхүү огцом өссөн байгаа нь анхаарал татаж байна.