Нүүрсний сонсгол үргэлжилж, Тавантолгой түлш ХХК-ийн асуудлаарх нотлох баримтыг шинжлэн судалж байна. Түр хорооны гишүүн Г.Ганболд: Тавантолгой түлш ХХК 997 тэрбум төгрөгийн өртэй байна. Эрдэнэс Тавантолгой ХК-иас их наяд гаран төгрөг авсан байна. Өөрөө асар их алдагдалтай компани атлаа ТУЗ-ийн гишүүд нь өндөр хэмжээний цалин, урамшуулал авдаг. ТУЗ-ийн гишүүд нь 1.1 тэрбум төгрөг, хамгийн ихдээ 125 сая төгрөгийн урамшуулал авсан байна. Гэтэл компани нь их наядын алдагдалтай. Энэ хүмүүс юу хийсэн гэж урамшуулал авдаг юм бэ?

Энэ асуултад хариулах ТУЗ-ийн дарга Ж.Батбаясгалан сонсголд ирээгүй.

Түр хорооны дарга Б.Энхбаяр: Нэг их наядын санхүүжилт авсан, маш их алдагдалтай, өртэй компанийн ТУЗ-ийн 2022.04.04-ний тогтоолоор “Компанийн 2021 оны үйл ажиллагааны болон санхүүгийн тайланд өгсөн Үндэсний аудитын газрын “зөрчилгүй” дүгнэлтийг харгалзан ТУЗ-ийн гишүүдэд үр дүнгийн урамшуулал олгохыг гүйцэтгэх захиралд зөвшөөрсөн тогтоол гаргасан байна.

Санхүүгийн ямар ч тайлан, архив, материалгүй, бүх ажил тендергүй явагддаг, ерөнхий нягтлан нь нөхрийнхөө хадгаламж руу мөнгө хийсэн байхад Монгол Улсын аудитын байгууллага зөрчилгүй гэж дүгнэсэн байна.

ТУЗ-ийн дарга Ж.Батбаясгалан гэхэд 2018-2022 онд 38 сая төгрөгийн цалин авч, 22 сая төгрөгийн урамшуулал авсан бол бусад хэлбэрээр 3.3 сая нийтдээ 64 сая төгрөг авсан байна.

 

ТУЗ-ийн гишүүд нийт 1.1 тэрбум төгрөгөөр Улаанбаатарыг утаагүй болгосон гэж  өөрсдийгөө шагнасан байна.  

УИХ-ын гишүүн Ж.Бат-Эрдэнэ: Танай компани Эрдэнэс Тавантолгой ХК-иас 1 их наяд төгрөгийн санхүүжилт авч, үүнээсээ 1 тэрбумыг нь ТУЗ-ийн гишүүд өөрсдөө авсан байна. Гавьяа байгуулсныхаа хөлс, төлбөр болгож авсан байна.

М.Ганбаатар таныг багаас чинь мэднэ, зүтгэлтэй. Гэхдээ та ТУЗ-ийнхөндөө боль гэж хэлж болдоггүй юм уу. Ичих хэрэгтэй, боль гэж хэлэх хэрэгтэй. Хариулдаг хүн алга болж, зугтсан, тэр Ж.Батбаясгалан гэдэг дарга.

Тавантолгой Түлш ХХК-ийн гүйцэтгэх захирал асан М.Ганбаатар: Миний хувьд гүйцэтгэх удирдлагаар, ТУЗ-өөс гарсан аливаа шийдвэрийг хэрэгжүүлж ажилласан.