Нүүрсний сонсгол нүүрс тээврийн асуудлаар үргэлжилж байна. Нийтдээ 5.2 сая тонн нүүрсийг гаалийг бүрдүүлэлтгүйгээр улсын хилээр гаргасаныг шинжээч дүгнэлтдээ дурдлаа. Үүний 25 хувийг ҮСХ-ны дарга Б.Батдаваагийн эхнэр, төрсөн дүүгийн хамаарал бүхий компаниуд гаргасан асуудал сөхөгдөж, Б.Батдаваа дарга гэр бүлийн хүний хамт сонсголд “шүүгдэв”.

Түр хорооны дарга Б.Энхбаяр: Танай эхнэр болон төрсөн дүүгийн хамаарал бүхий компаниуд нийтдээ нэг сая гаруй тонн нүүрсийг гаалийн бүрдүүлэлтгүй гаргасан асуудал яригдаж байна. Үүнд таны тайлбарыг сонсъя.

ҮСХ-ны дарга Б.Батдаваа: Сая танилцуулагдсан компаниудад би болон манай гэр бүлийн гишүүн хөрөнгө, хувьцаа эзэмшдэг зүйл байхгүй. Манай эхнэр хөдөлмөрийн гэрээгээр ажилладаг ажилтан нь. Тээврийн үйл ажиллагаа явуулдаг компаниуд ямар үйл ажиллагаа явуулдаг, яадгийг нь би мэдэхгүй. Учир нь би энэ компанийн үйл ажиллагаанд оролцдоггүй. Миний нэгдмэл сонирхол, хөрөнгө оруулалт энэ компанид байхгүй учраас мэдэхгүй.

Түр хорооны дарга Б.Энхбаяр: Таны төрсөн дүүгийн нэр дээрх Цэцээ гуа компани байна. Гаалийн бүрдүүлэлтгүй 130 мянган тонн нүүрс тээвэрлэсэн гэх компанийн гүйцэтгэх удирдлага Батмөнхийн Сувддэлгэр гэж таны төрсөн дүү мөн үү?

ҮСХ-ны дарга Б.Батдаваа: Батмөнхийн Сувддэлгэр гэдэг хүн миний төрсөн дүү мөн. Гүйцэтгэх захирлаар ажилладаг, хувьцаа эзэмшигч биш. Саяхан энэ ажилд орж, гүйцэтгэх захирлаар бүртгүүлсэн.

Түр хорооны дарга Б.Энхбаяр: Шинжээчийн дүгнэлтэд таны эцэг Гаалийн ерөнхий газрын даргаар ажиллаж байсан Баатар гэдэг хүн байдаг гэж танилцууллаа. Энэ үнэн үү?

ҮСХ-ны дарга Б.Батдаваа: Намайг Батмөнхийн Батдаваа гэдэг. Энэ сонсголоор яагаад ийм асуудал яригдаж байгааг би ойлгохгүй байна. Таныг хувь хүний асуудлыг хүндэтгэж үзэхийг хүсэж байна.

Түр хорооны дарга Б.Энхбаяр: Хувь хүний асуудал руу орохыг хүсэхгүй. Нийт дүнгээрээ 5.2 сая тонн нүүрс гаалийн бүрдүүлэлтгүй гарсан. Үүний нэг сая гаруй буюу дангаараа 25 хувийг таны хамаарал бүхий хүмүүсийн удирдлагаар ажиллаж байгаа нүүрс тээврийн компаниудад яригдаж байна. Тэгэхээр энэ бол хувийн асуудал биш болж хувирч байгаа юм.

Шинжээчээс асууя, Гаалийн Ерөнхий газрын дарга асан Баатарын хүүхэд гэж танилцуулсан. Үүнийг нотлох баримт байна уу.

Шинжээч:  Улсын бүртгэлийн нэгдсэн архиваас ҮСХ-ны дарга Б.Батдаваагийн төрсөн эцэг нь ГЕГ-ын дарга асан Баатар гэдэг хүн мөн гэдгийг файл хэлбэрээр ирүүлсэн.

Түр хорооны дарга Б.Энхбаяр: Б.Батдаваа дарга файл хэлбэрээр үзэх үү?

ҮСХ-ны дарга Б.Батдаваа: Шинжээчдийг сайн нягтлаарай гэж хүсье. Би мэдээ орсон цагаасаа л Батмөнхийн Батдаваа байсан. Миний аав 2002 онд зам тээврийн ослоор нас барсан. Яг одоо яригдаж байгаа асуудалд би шууд хамааралтай бол хариулахад бэлэн байна. Шаардлагатай гэвэл иргэний үнэмлэх, аав ээжийнхээ зургийг үзүүлэхэд бэлэн байна. Миний эцэг эхийг хүндэтгэнэ үү.

Түр хорооны дарга Б.Энхбаяр: Таны гэр бүлийн хүн Амгалангийн эцэг Цэрэнпүрэв гэж хүн байна. Энэ хүн Эрдэс баялаг, эрчим хүчний яамны ТНБД-аар ажиллаж байсан хүн мөн үү?

ҮСХ-ны дарга Б.Батдаваа: Мөн.

Түр хорооны дарга Б.Энхбаяр: Нийтдээ 8 компани, 3 НАБТ дээр хамаарал бүхий байдал гарч ирж байна. Нийтдээ 1 сая гаруй тонн нүүрс гаалийн бүрдүүлэлтгүй гарсан шинжээчийн дүгнэлт байна. Та ямар тайлбар хийх вэ?

ҮСХ-ны дарга Б.Батдаваагийн эхнэр Ц.Амгалан:  Миний бие 2007 онд их сургуулиа төгсөөд, уул уурхайн салбарт ажиллаж байна. И коммодитс монголиа интеллижент ложистикс ХХК-д 2016 онд ажилд орсон. Манай хөрөнгө оруулагч Хонконгийн биржид гарсан, нээлтэй ХХК байгаа.

2016 оноос төлөөлөгчийн статустай байж байгаад 2020 оноос хойш тээврийн үйл ажиллагаа эрхэлж байна. Тоон үзүүлэлттэй санал нийлэхгүй, няцааж байна. Үнэн зөв ээдээллээ гаргаж өгөхөд бэлэн байна гэсэн мэдээллийг өгч, түүний өмгөөлөгч хувийн мэдээлэлд хүндэтгэлтэй хандахыг Түр хорооны даргаас хүслээ. 

Б.Хэрлэн