Украины Закарпат мужийн Ужгород хотын шүүх тус улсын Ерөнхийлөгчийг дэмждэг "Ард түмний зарц" намаас Керецковскийн суурингийн зөвлөлд сонгогдсон гишүүн Сергей Батриныг цагдан хорих шийдвэр гаргажээ. 

РБк агентлагийн мэдээлснээр, Сергей Батрин 12 дугаар сарын 15-ны өдөр хурлын танхимд гурван гранат дэлбэлсний улмаас 23 хүн гэмтэж, нэг нь эмнэлэгт нас барсан байна. Сергей Батрин өөрөө эрчимт эмчилгээний тасагт шилжиж, 12 дугаар сарын 16-ны өдөр ухаан оржээ. Тэрбээр удирдлага болон бусад хурлын гишүүдийн шийдвэрт нөлөөлөхийг завдсан ч санасандаа хүрээгүй тул гранат дэлбэлсэн гэнэ. 

Ийнхүү хурлын танхимд гурван гранат дэлбэлж, 16 эрэгтэй, долоон эмэгтэйг гэмтээсэн түүнийг цагдан хорихоор болсон бөгөөд хурлын гишүүнийг Украины Эрүүгийн хуулийн 258 дугаар зүйлийн 2 дахь хэсэгт заасны дагуу "алан хядах ажиллагаа" үйлдсэн хэрэгт сэжиглэж байгаа аж. 

Г.Бямбасүрэн