БНАСАУ 12 дугаар сарын 17-ны үдэш болон 18-ны өглөө хоёр баллистик пуужин харвасан талаар бид өмнө нь мэдээлсэн. Эхний пуужин нь бага тусгалт пуужин байсан бол өнөө өглөө хөөргөсөн пуужин тив алгасагч пуужин байсан гэж Японы Батлан хамгаалахын яам мэдэгджээ.

Тодруулбал, 12 дугаар сарын 18-ны өглөө хөөргөсөн Хойд Солонгосын пуужин 73 минут нисэж, хамгийн өндөртэй 6000 км өндөр аван нийт 1000 км замыг туулсан гэж Японы Батлан хамгааласх яам мэдэгдсэнийг NHK дамжуулсан байна. Тус яамны онцолсноор Хойд Солонгосын пуужин 15 мянган км зайг туулахс чадвартай гэнэ. Энэ нь пуужин АНУ-д хүрэх боломжтой гэсэн үг юм.

Хойд Солонгос орон нутгийн цагаар 08:24 цагт пуужин хөөргөж, пуужин 09:39 цагт Япон тэнгист унасан байна. Пуужин унасны улмаас ямар нэг хохирол гараагүй гэж Японы тал мэдэгджээ. Харин 12 дугаар сарын 17-ны өдөр хөөргөсөн баллистик пуужин 400 км зам туулсан байна.

Г.Бямбасүрэн