Арабын Нэгдсэн Эмират улсын Рас-Аль-Хаймас эмиратын оршин суугчид жингээ хасаад их хэмжээний мөнгөн шагнал авах боломжтой болжээ. Энэ талаарх мэдээллийг Khaleej Times сонин дамжуулсан байна.

Эх сурвалжийн мэдээлснээр, 12 долоо хоног үргэлжлэх арга хэмжээ 12 дугаар сарын 16-ны өдөр эхэлж, Таргалалттай тэмцэх дэлхийн өдөр тохиодог гуравдугаар сарын дөрөвнийг хүртэл үргэлжлэх юм байна. Тэмцээнд биечлэн, цахимаар, хамт олноороо болон хүүхдүүд, сургуулийн ажилтнууд гэсэн нийт дөрвөн төрөлд оролцох боломжтой аж. 

Ангилал тус бүрийн оролцогчдод мөнгөн шагнал олгох гэнэ. Мөн бодитоор  оролцох төрлийн гурван ялагч хассан жин тутамдаа 300, 200, 100 дирхамын шагнал авах аж. Харин цахимаар оролцсон хүмүүс үнэ төлбөргүй аяллын тасалбар, эрүүл мэнд болон амралтын хөтөлбөр, спорт танхимд үйлчлүүлэх зэрэг олон шагналын эзэн болох гэнэ.

Биечлэн оролцох төрөлд бүртгүүлсэн хүмүүсийг 2023 оны 12 дугаар сарын 16, 17-ны өдрүүдэд РАК эмнэлэг дээр жинг нь хэмжих бол цахимаар оролцогчид ойролцоох эмнэлэгт жингээ хэмжүүлэх юм байна.

Г.Бямбасүрэн