Беларусьт үг хэлэх, хэвлэн нийтлэх эрх чөлөө хязгаарлагдмал байдгийн дээр иргэд олон нийтийн сүлжээнд Ерөнхийлөгч болон эрх баригчдыг гутаан доромжилсон хэрэгт буруутгагдан ял сонсох тохиолдолд олонтаа гардаг. 

Энэ удаад, Александр Лукашенког доромжилсон хэрэгт Брестийн оршин суугч Владимир Лукьянчук буруутгагдаж, жирийн дэглэмтэй хорих ангид нэг жилийн хугацаанд ял эдлэхээр болжээ. "Берасцейская вясна" сонины мэдээлснээр, 2023 оны есдүгээр сард Владимир Телеграм суваг дээр сэтгэгдэл үлдээхдээ Лукашенког "хоосон чалчигч" хэмээсэн нь хэрэгт татагдах үндэслэл болсон байна. 

Беларусьт эрх баригчдын төлөөллийг доромжилсон хэргээр эрүүгийн хэрэг үүсгэх тохиолдол байнга гардаг. Хамгийн сүүлд гэхэд Сморгоини хотын 57 настай эмч цахим сүлжээнд Лукашенког "Улс оронд терроризм, геноцид үйлдсэн, эзлэн түрэмгийлэл ч хийж байсан" хэмээн бичснийхээ төлөө зургаан жилийн хорих ял сонссон юм.

Мөн "өөдгүй амьтан эрх мэдэлтэйгээ зууралдаж байна"  гэж Лукашенкогийн талаар пост оруулсан 67 настай эр нэг жилийн хорих ял, энэ оны есдүгээр сард 63 настай хөгжлийн бэрхшээлтэй иргэн 2021 онд Лукашенкогийн талаарх постонд сэтгэгдэл үлдээснээсээ болж нэг жил, гурван сарын ял сонсож байсан гэх зэргээр сүүлийн үед гэхэд л 10 гаруй хэрэг гарч байв. 

Г.Бямбасүрэн