Палестины хэт даврагч ХАМАС бүлэглэлтэй тэмцэх шаардлагатай байгаа ч энгийн палестинчуудын аюулгүй байдлыг Израил хангах үүрэгтэй гэж АНУ-ын Ерөнхийлөгч Жо Байден мэдэгджээ. Тэрбээр Украины Ерөнхийлөгч Володимир Зеленскийтэй Цагаан ордонд уулзсаныхаа дараа хэвлэлийн бага хурал хийлгэх үеэрээ ийнхүү мэдэгдсэнийг Ройтерс дамжуулсан байна. 

Түүний өгүүлснээр, "энгийн палестинчуудын аюулгүй байдалд ихээхэн санаа зовниж байгаагаа" АНУ Израилын талд илэрхийлсэн гэнэ. Мөн Газын зурвас дахь энгийн иргэдийн амь нас хохирохгүй байх тал дээр Израилын цэргүүд анхаарах ёстой, ХАМАС -ыг мөшгших нь Израил энгийн палестинчуудын өмнө хүлээх үүргийг багасгах ёсгүй гэж Байден мэдэгджээ. 

Энд дуулгахад, 10 дугаар сарын долооны өдөр ХАМАС бүлэглэл Израил руу гэнэт халдсанаар энэ хоёр талын хооронд дайн дэгдсэн юм. ХАМАС-ын халдлагын дараа Израил ХАМАС-т дайн зарлаж, Газын зурвасыг агаараас бөмбөгдөж эхэлсэн бол 10 дугаар сарын сүүлээр хуурай замын цэргийн ажиллагаа явуулсны улмаас энгийн иргэд олноор амиа алдсаар байна. Израилын тал ХАМАС-ын алан хядагчид энгийн иргэдийн дунд нуугдаж байгаа гэж мэдэгдэн, эмнэлэг, дүрвэгчдийн хуаранд ч цохилт өгсний улмаас амиа алдсан палестинчуудын тоо 18 мянгыг даваад байгаа юм. 

Г.Бямбасүрэн