Цагдаагийн байгууллагад 2023 оны 12 дугаар сарын 10-ны өдрийн 20.15 цагт Сонгинохайрхан дүүргийн долоодугаар хорооны нутаг дэвсгэрт байрлах шатахуун түгээх станцын орчимд “Бусдад зодуулсан” гэх дуудлага, мэдээлэл бүртгэгджээ.

Тус шатахуун түгээх станцын түгээгч эмэгтэй дугаарлан зогсож буй жолооч нарт "Шатахуун дууссан учраас түгээлтээ зогсоож байгаа" талаар хэлсэн байна. Гэтэл дараалалд байсан тээврийн хэрэгслийн жолооч, 29 настай эрэгтэй "бензин өгсөнгүй" гэх шалтгаанаар түгээгчийн биед халдаж, түлхэн унагажээ. Уг үйлдэлд мөрдөн шалгах ажиллагаа явуулж байна.

Хохирогч эмэгтэйн биед гэмтэл учирсан эсэхэд шинжилгээний байгууллагад шинжээч томилсон бөгөөд одоогоор шинжилгээний дүгнэлт гараагүй байна.