Манай улсын баруун аймгуудын нутагтай хил залгаа, ОХУ-ын Бүгд Найрамдах Алтай Улсад урьд өмнө тохиож байгаагүй хүйтэн өдрүүд үргэлжилж байгаа талаар "Моя планета" суваг мэдээлжээ.
Эх сурвалжийн мэдээлснээр, Алтай улсын Курай сууринд 12 дугаар сарын 11-ний өдөр эрс хүйтэрч, агаарын хэм хэмжигч төхөөрөмж -55-60С хэмийг зааж байгааг харуулсан дүрс бичлэгийг нутгийн оршин суугчид цахим сүлжээнд нийтэлсэн байна. Харин -60 С хэм хүрсэн талаарх албан ёсны мэдээлэл хараахан гараагүй байгаа юм.
Гэхдээ Оросын ихэнх нутгаар эрс хүйтэрнэ гэдгийг өнгөрсөн долоо хоногт цаг уурчид анхааруулж байв. Тэр дундаа Сибирьт -44С хэм, Якутад -48-56 С хэм хүрч хүйтэрнэ гэдгийг анхааруулж байлаа. Буриадад гэхэд л хэд хэдэн тосгонд хэт хүйтэрсний улмаас дунд сургуулиудын сургалтын ажиллагааг түр зогсоосон бол 12 дугаар сарын 12-ны өдөр Улаан-Үд хотод хоёрдугаар ээлжийн ангиудын хичээлийг цуцалжээ.
Г.Бямбасүрэн
| Уншиж байна |