Сүүлийн үед Монгол Улсаас Е9 (мэргэжлийн бус ажилчин) визээр Өмнөд Солонгост ирэх хүмүүсийн тоо нэмэгдсэн, эдгээр хүмүүс хөдөө аж ахуй, мал аж ахуй, загас агнуур зэрэг салбарт ажиллаж болох ч нүүлгэлтийн үйлчилгээний салбарт ажиллах хориотой гэж Өмнөд Солонгосын Хөдөлмөр, ажил эрхлэлтийн яам мэдэгджээ. 

Гэхдээ нүүлгэлтийн үйлчилгээг харахад монголчуудгүйгээр энэ салбар цааш явах аргагүй мэт санагдана гэж Bizherald сонин мэдээлсэн байна. Энэ сонины сурвалжлагчтай ярилцсан, нүүлгэлтийн компанийн төлөөлөгчийн өгүүлснээр тус компанийн ажиллах хүчний гуравны нэг нь монголчууд байдаг гэнэ.

"Нүүлгэх ажил хүнд учраас манай улсын иргэд тэр бүр ийм ажил хийдэггүй. Харин монголчууд чин сэтгэлээсээ хандаж, ажлаа сайн хийдэг. Тэд хятадуудыг бодвол солонгос хэл хурдан сурахын зэрэгцээ тэд маш бяр чадалтай хүмүүс байдаг. Таван тонны ачааны машин ачихад гурван ачигч эр хэрэгтэй боллоо гэж бодъё. Тэд гурвуулаа солонгос хүн байвал тун хэцүү" хэмээн ярьжээ.

Нүүлгэлтийн ажилд монголчуудыг авах сонирхолтой байдаг өөр нэг шалтгаан нь тэд бусад орныхноос илүү солонгосчуудтай адилхан төрхтэй байдаг гэнэ.

"Манай компанид гадаадын ажилчид бий. Гэхдээ бид айл нүүлгэх болоход монголчууд, солонгосчуудыг л явуулдаг" хэмээн Инчоны тээврийн компанийн захирал өгүүлсэн байна. Түүнчлэн хоёр монгол гурван солонгос хүний ажлыг хийж чаддаг хэмээжээ.

Bizherald сонин цааш бичихдээ, хэдийгээр Монголын хүн ам гурван сая орчим ч Солонгост ажил хийж байгаа монголчуудын тоо 53 мянгад хүрсэн, Монголын хүн амын хоёр хувь нь Өмнөд Солонгост амьдарч байгааг онцолсон байна.

Г.Бямбасүрэн