Өнгөрсөн долоо хоногт Хойд Солонгос тагнуулын хиймэл дагуул амжилттай хөөргөсөн талаараа мэдэгдэж байсан. Энэ хиймэл дагуул Пентагоны зургийг авсан талаар Солонгосын цахим мэдээллийн төв агентлаг мэдээлжээ. 

Эх сурвалжийн мэдээлснээр, "Маллигён-1" тагнуулын хиймэл дагуулын авсан, Цагаан ордон, Пентагоны зургуудтай Ким Жон Ун танилцсан гэнэ. Агаар сансрын техникийн улсын ерөнхий газрын дэргэдэх Пхеньяны нийтлэг хяналт, зохицуулалтын төв 11 дүгээр сарын 28-нд шилжих шөнө тус улсын удирдагч Ким Жон Унд илтгэж, энэ илтгэлдээ 11 дүгээр сарын 27-ны 23:35 цагт авсан Америкийн Норфолк цэргийн баазын зураг, 23:36 цагт авсан Цагаан ордон болон Пентагоны зургуудыг хавсаргасан гэж эх сурвалж онцолжээ. 

Үүнээс өмнө, 11 дүгээр сарын 27-ны 09:17 цагт авсан Гуам дахь Америкийн агаарын баазын гэрэл зургийг үзүүлсэн гэнэ. Түүнчлэн 11 дүгээр сарын 25-ны үдэш авсан, Италийн нийслэлийн зурагтай ч БНАСАУ-ын удирдагч танилцсан гэж Солонгосын цахим мэдээллийн төв агентлаг мэдээлжээ.

Г.Бямбасүрэн