Дэлхий даяар алдартай Baby Shark дуунаас сэдэвлэсэн "Baby Shark Big Movie" нэртэй бүрэн хэмжээний хүүхэлдэйн киног Paramount студи бүтээжээ. Энэ киноны трейлерийг тус студи олны хүртээл болгосон байна.

Кинон дээр бяцхан аварга загас гэр бүлийнхэнтэйгээ хамт Чомп-Сити хэмээх аварга загаснуудын их хот руу явахаар болно. Бяцхан аварга загас их хотод дасан зохицоход хэцүү гэж бодсоны улмаас энэ мэдээнд тэгтлээ их баярлахгүй. Харин ээж нь тэднийг ихээхэн адал явдал хүлээж байгаа гэж ятгана. Гэвч тэдний гэр бүлийн төлөвлөгөөнд муу санаат далайн од саад болох аж.

Энэ киноны дүрүүдэд жүжигчин Эшли Тисдейл, Өмнөд Солонгосын Enhypen хамтлагийн гишүүд зэрэг олон алдартнууд дуу оруулжээ. "Baby Shark Big Movie" 12 дугаар сарын наймны өдөр  Paramount+ стриминг дээр нээлтээ хийх юм байна. 

Энд дуулгахад Baby Shark дуу анх 2016 онд Pinkfong Юүтүб сувагт байршиж байлаа. Энэ дуу дэлхий даяар хит болсон бөгөөд 2022 оны нэгдүгээр сард "Baby Shark" дуу Юүтүб суваг дээр 10 тэрбум үзэлттэй болсон анхны видео болсон юм. Харин өнөөдрийн байдлаар үзэлт нь 13 тэрбумд хүрчээ. 

Г.Бямбасүрэн