НИТХ-ын ээлжит бус XVI хуралдаанаар нийслэлийн төсвийн тодотголыг хэлэлцэж байна. Энэ үеэр төлөөлөгч Д.Пүрэдаваа нийслэлийн байгууллагууд хэзээ Яармагт баригдсан шинэ хотын захиргаа руу нүүхийг тодрууллаа. Энэ асуултад нийслэлийн Засаг дарга Х.Нямбаатар “Би шинэ Хангарьд ордны ажлыг очиж үзсэн. Нэгдүгээр блокын ажил дууссан, хоёрдугаар блокын ажил дутуу байна. Мөн л санхүүгийн асуудал. Гүйцэтгэл гаргахгүйгээр үлдэгдэл санхүүжилтийг өгөхөөр дараа нь асуудал үүснэ. Тиймээс арилжаа банкнаас гүйцэтгэгч компанид зээл олгуулах нөхцөлтэйгээр хэлэлцэж, 2024.02.26 гэхэд барилгыг дуусгахаар тохиролцсон. Нийслэлийн Засаг даргын Тамгын газар, харьяа 47 байгууллага, НИТХ 2024 оны 03 дугаар сарын 01-нээс Яармаг руу нүүж очно.

Хотын захиргаа нүүж очихоор Яармагийн замын ачаалал дахин нэмэгдэнэ. Тиймээс Яармагийг ТЭЦ-ийн замтай холбох замын ажлыг ирэх жил эрчимжүүлнэ. Мөн дүүжин тээврийн ажил 2024.03.01-нээс эхэлнэ. Ирэх оны төсөвт дэлхийн банкны санхүүжилтээр хэрэгжих Шинэ Яармаг хорооллын уулын энгэр дагасан 8.6 км замын газар чөлөөлөлтийг эхэлж, бэлтгэл ажлыг хангана” гэсэн хариултыг өглөө.  

Засгийн газрын шийдвэрээр хотын байгууллагуудын одоо байрлаж буй “Хангарьд” ордныг Шүүхийн ерөнхий зөвлөл, Шүүхийн сахилгын хороо, Улсын дээд шүүхийн мэдэлд шилжүүлжээ.