ОХУ Украинд дайн дэгдээснээсээ хойш хувийн цэргийн "Вагнер" компаниар дамжуулан хоригдлуудыг цэрэгт элсүүлж, фронт руу илгээх болсон талаарх мэдээлэл олон улсын хэвлэлүүдээр байнга гарч байсан. Вагнерын эзэн Пригожин амьд ахуйдаа биечлэн хорих газруудаар явж, хоригдлуудыг цэрэгт элсвэл ялаас нь чөлөөлнө хэмээн амлаж байв. Ийм байдлаар олон мянган хоригдол фронтыг зорьсон гэх мэдээллийг Оросын хараат бус хүний эрхийг хамгаалах байгууллагууд ч мэдээлж байлаа. 

Фронт руу илгээж, ялаас нь чөлөөлөх хоригдлууд хөнгөвтөр гэмт хэрэг үйлдсэн байх, онц хүнд гэмт хэрэг үйлдсэн бол цэрэгт элсүүлж, фронт руу илгээхгүй гэсэн журам гарч байсан ч энэ хууль журам байнга зөрчигдөж байгаа талаарх мэдээлэл гарсаар байна. 

Тухайлбал, "Агентство" сонины мэдээлснээр, Орост хүн амины хэргээр ял шийтгэл сонссон 17 хүнийг 2022-2023 оны хооронд Владимир Путин өршөөсөн байна. Тэд бүгд Украин дахь дайнд оролцон, фронтоос эргэн ирж, эрх чөлөөтэй болжээ. Мөн тэдний зарим нь дахин гэмт хэрэг үйлдэж байгаа гэнэ. 

Эх сурвалжийн мэдээлснээр, хүн амины хэргээр ял шийтгэгдсэн этгээдүүд фронт дээр хэдхэн сар болоод өршөөл хүртэн, эргээд хэвийн амьдралд шилжсэн байна. Тэдний зарим нь дахин гэмт хэрэг үйлдэж байгаагийн дотор хүн амины хэрэг давтан үйлдсэн тохиолдлууд ч гарчээ. 

Энд дуулгахад, 2022 оны зунаас эхлэн Вагнер цэргийн компани хоригдлуудыг эгнээндээ нэгтгэж, хөлсний цэрэг болсон хоригдлууд зургаан сарын дараа өршөөл хүртэж байв. Харин Вагнерын эзэн, өнгөрсөн зун амиа алдсан Пригожин Батлан хамгаалахын удирдлагатай таарамжгүй болсны дараа Батлан хамгаалах яам өөрсдөө хоригдлуудыг элсүүлдэг болсон юм. 

Г.Бямбасүрэн