ХАМАС бүлэглэл 10 дугаар сарын долооны өглөө Израил руу гэнэт халдсанаар энэ хоёр талын хооронд дайн дэгдсэн. Улмаар Газын зурваст олон мянган хүн амиа алдаж, хүмүүнлэгийн сүйрэл нүүрлэсэн тул олон улс Израилд хандан хүмүүнлэгийн түр завсарлага авах уриалга гаргаж, улмаар Израил энэ уриалгыг хүлээн авсан талаарх мэдээлэл пүрэв гарагт гарч байв.

Израилын тал өдөр бүр Газын зурвасын хойд хэсэгт дөрвөн цагийн хугацаанд хүмүүнлэгийн завсарлага авахыг зөвшөөрсөн бөгөөд энэ завсарлагын талаар АНУ-ын Жо Байден мэдэгдэл хийжээ.

"Энгийн иргэдийг аюулгүй газарт хүргэх, олзны хүмүүсийг суллах, Газын зурвас руу хүнс, ус, эм бэлдмэл нийлүүлэх ажлыг эрчимжүүлэхийн тулд байлдааны ажиллагаанд хүмүүнлэгийн завсарлага авах нь чухал гэдгийг би хэдэн долоо хоногийн туршид Израилын талтай ярилцсан" гэж Байден Х сүлжээнд бичжээ. 

Түүний өгүүлснээр, хүмүүнлэгийн ачааны нийлүүлэлтийг нэмэгдүүлэхийн тулд Цагаан ордон боломжит бүх арга хэмжээг авч байгаа гэнэ.

"Хоёр өдрийн өмнө хүмүүнлэгийн ачаа бүхий 96 ачааны машин очсон, өчигдөр 106 машин очлоо. Гэхдээ богино хугацаанд, илүү их ачаа хүргэх хэрэгтэй байна. Өдөрт 150-иас багагүй тооны ачааны машин тийш хүрдэг байлгахыг бид зорьж байна. Хүмүүнлэгийн түр завсарлага нь иргэдийг аюулгүй, байлдааны бүсээс хол газарт аваачихад тусална. Энэ бол зөв алхам" хэмээн Байден мэдэгджээ.

Хүмүүнлэгийн түр завсарлага гэдэг нь байлдааны ажиллагаа явагдаж буй тухайн газар нутгийн хүрээнд тодорхой хугацаанд байлдааны ажиллагааг түр зогсоох үйл явц бөгөөд гэхдээ чухамхүү "хүмүүнлэгийн зорилгыг биелүүлэх" зорилготой байдаг аж. 

Г.Бямбасүрэн