Биткоины үнэ 2022 оны тавдугаар сарын зургааны өдрөөс хойш анх удаа 36 мянган долларыг давжээ. Энэ талаар Coindesk цахим хуудаснаас авсан эх сурвалжтайгаар ТАСС агентлаг мэдээлсэн байна. 

Тодруулбал, Улаанбаатарын цагаар 11 дүгээр сарын есний 07:47 цагт биткоины үнэ 1,73 хувиар өсөж, 36 031 долларт хүрсэн бол дөрвөн минутын дараа өсөлт саарч, биткоины үнэ 35 758 долларт хүрчээ. Биткоины үнэ хамгийн сүүлд 2022 оны тавдугаар сарын зургааны өдөр 36 мянган долларыг давж байв. 

MicroStrategy компанийн үүсгэн байгуулагчдын нэг Майкл Сэйлор цаашид биткоины үнэ арав дахин нэмэгдэж магадгүй хэмээсэн байна. Түүний өгүүлснээр, урт болон дунд хугацааны ирээдүйд криптовалютын эрэлтийн өсөлт биткоины ханш нэмэгдэхэд нөлөөлөх гэнэ. 

Г.Бямбасүрэн