Бразилын Коти хотод дээрэмчид Саудын Арабын "Аль-Хилял", Бразилын шигшээ багийн гишүүн Неймарын найз бүсгүй болон саяхан мэндэлсэн охиныг нь хулгайлахыг завджээ. Энэ талаар O Globo мэдээлсэн байна. 

Эх сурвалжийн мэдээлснээр, 11 дүгээр сарын долооны шөнийн гурван цаг орчимд гурван гэмт этгээд Неймарын найз бүсгүйн ээжийн гэрт халдан орж, бүсгүйн ээжийн амыг таглан, түүнд болон нөхөрт нь буу тулгажээ. Гурван этгээдийн нэг нь тус дүүрэгт амьдардаг 19 настай оршин суугч байсан бөгөөд тэрбээр хамсаатнуудаа хороолол руу нэвтрүүлсэн байна. Улмаар дээрэмчид үнэт эдлэл, брэндийн цүнх, цаг гээд нийт 120 мянган долларын үнэ бүхий эд зүйлс дээрэмдсэний дээр Неймарын найз бүсгүй Бруна болон саяхан мэндэлсэн охин нь хаана байгааг ээжээс нь асууж буу тулгажээ. 

Неймар болон түүний найз бүсгүй Бруна нар энэ хэрэг гарсны дараа мэдээлэл хийж, тэд тухайн үед энэ байшинд байгаагүй, халдлагад өртөөгүй хэмээн Инстаграм хуудсандаа бичсэн байна. Харин Брунагийн ээжийн гэр рүү халдсан этгээдүүдийг цагдаагийнхан шуурхай олж тогтоон баривчилжээ.

Г.Бямбасүрэн