БНХАУ-ын "Бүс ба зам" дэд бүтцийн төсөл оролцогч орнууддаа хөрөнгө оруулалтын төсөл олныг олж өгсөн ч асар их өрөнд унагасан гэж CNN мэдээлжээ. 

Энэ сарын зургааны өдөр Америкийн AidData судалгааны хүрээлэн нийтэлсэн тайланд өгүүлснээр, "Бүс ба зам" төслийг эхлүүлснээсээ хойш, 2000-2021 оны туршид хөгжиж буй орнуудад нийт 1,34 их наяд долларын зээл олгосон байна. хятадын зээл гүүр, боомт, автозам барих ажилд зарцуулагдсан бөгөөд зээлдэгчдийн ихэнх нь одоо өрөө төлж барагдуулах шатандаа явж байгаа аж. Ийнхүү 1,34 их наяд зээл олгосноороо Хятад улс дэлхийн хамгийн том зээлдэгчид тооцогдож байгааг энэ тайланд онцолжээ. Үүний зэрэгцээ бага болон дунд орлоготой улс орнуудад БНХАУ жилд 80 тэрбум долларын тусламж, зээл олгодог байна.

Шинжээчдийн онцолсноор, Хятад улс хөгжиж буй орнуудад олгосон зээлийн 55 хувь нь одоо төлөгдөх шатандаа явж байгаа бөгөөд БНХАУ 20 жилийн хугацаанд нийтдээ 165 оронд санхүүжилт олгожээ. Хэдийгээр зээл хүлээн авагчдын ихэнх нь зээлээ төлөх шатандаа байгаа ч өрөө төлж эхлээгүйн дээр зээлээ дахин санхүүжүүлэх хүсэлтэй орнууд ч багагүй байгаа гэнэ. Энэ нь хэтдээ ихээхэн эрсдэл дагуулж болзошгүйг шинжээчид онцолжээ. 

Г.Бямбасүрэн