Италийн Сенигалли хотын орон гэргүй нэгэн эр сугалаанаас их хэмжээний мөнгө хожжээ. Гэсэн ч түүнд бичиг баримт байхгүй тул мөнгөө авч чадахгүй байгаа талаар The Mirror мэдээлсэн байна. 

Энэ эрийг Жанлуижи гэдэг аж. Тэрбээр олон жилийн туршид лотоны тасалбар худалдан авч байгаа бөгөөд лотог бөглөхдөө нэг л ижил тоог давтан бичдэг гэнэ. Жанлиужи хамгийн сүүлд мягмар гарагт 15 еврогоор тасалбар худалдан авч, өмнө нь бичдэг байсан тоонуудаа бөглөжээ. Энэ удаад түүнд аз таарч, 37 мянган еврогийн (монгол мөнгөөр 141 сая төгрөг) хонжвор хүртэхээр болсон аж. Гэвч орон гэргүй эр ямар ч бичиг баримтгүй тул хонжвороо авах боломжгүй болсон гэнэ.

Түүнд эрүүл мэндийн даатгалын карт байхгүй, паспортаа ч олон жилийн өмнө гээсэн, өөрийг нь гэрчлэх цорын ганц баримт бичиг нь татварын дугаар байгаа аж. Гэвч энэ нь хонжворын мөнгөө авахад хангалтгүй аж. Харин хотын нэгэн буяны байгууллага Жанлуижид туслахаар болсон байна. Тус байгууллагын мэдэгдсэнээр өнгөрсөн өвөл сайн дурын ажилтнууд түүнд халамж тавьж байсан, тухайн үед бичиг баримтуудынх нь хуулбарыг авсан нь хадгалаастай байгаа гэнэ.

Г.Бямбасүрэн