Нидерландын нийслэл Амстердамаас Манчестер хүрэх нислэг шумуулнаас болж олон цаг саатжээ. Энэ талаар Британийн The Sun сонин мэдээлсэн байна. 

Эх сурвалжийн мэдээлснээр, Амстердам-Манчестер чиглэлийн нислэг саатаж, зорчигчид нислэгээ таван цаг хүлээжээ. Онгоцонд техникийн хүндрэл гарсны улмаас нислэг саатсан гэж агаарын тээврийн компанийнхан зорчигчдод мэдээлсэн ч дараа нь нисгэгч гарч ирэн, нислэг саатсан жинхэнэ шалтгааны талаар мэдэгдсэн байна. 

Онгоц таван цаг саатсан шалтгаан нь нисгэгч шумууланд хазуулсантай холбоотой байжээ. Нисгэгч шумууланд хазуулсныхаа дараа онгоцыг бүхэлд нь сайтар цэвэрлэхийг шаардаж, улмаар нислэг саатсан аж. 

Ийм шалтгааны улмаас олон цаг саатуулсанд зорчигчид дургүйцсэн ч агаарын тээврийн компани тэднийг саатуулсныхаа төлөө ердөө 3,9 фунт буюу монгол мөнгөөр 17 000 төгрөгний үнийн дүн бүхий хоол авч идэх тасалбар өгчээ.

Г.Бямбасүрэн