Аргентинд нэгэн иргэн санамсар болгоомжгүйгээс гал алдсаны улмаас амралт зугаалгын хот болсон Карлос Пас бүрэн шатах эрсдэл үүсжээ. Энэ талаар МИР24 суваг мэдээлсэн байна. 

Эх сурвалжийн мэдээлснээр, Аргентины төв хэсэг дэх, 56 000 хүн амтай амралт зугаалгын Вилья Карлос хот гал түймрийн аюултай нүүр тулжээ. Энэ гал түймэр нэгэн иргэн гал алдсанаас үүдэлтэй аж. Тодруулбал, ойд гал түлэхийг хориглодог ч 27 настай эр кофе чанаж уухаар түүдэг асаасны улмаас гал алдаж, хүчтэй салхины нөлөөгөөр гал хурдацтай тархан, хотын нэг хэсгийг түймрийн утаа бүрхсэн байна. 

Улмаар гал хурдацтай тархаж, хотын нэгэн дүүрэгт ойртон ирсэн бөгөөд хотын зарим оршин суугчид орон гэрээ орхихоос аргагүй болжээ. Түүнчлэн хотыг бүхэлд нь нүүлгэн шилжүүлэх ажлыг зохион байгуулахаар төлөвлөж байгаа гэнэ. Хотыг бүхэлд нь аюулд учруулсан 27 настай эрийг зориудаар галдан шатаасан хэрэгт буруутган баривчилсан байна.

Г.Бямбасүрэн