Палестины ХАМАС бүлэглэл Израил руу гэнэт халдаж, улмаар энэ хоёр орны хооронд зэвсэгт сөргөлдөөн үүссэнтэй холбоотойгоор олон улсын агаарын тээврийн компаниуд нислэгээ зогсоож, улмаар Израилд байсан гадаадын иргэд гарах гарцгүй болсон юм. Тиймээс улс орнууд иргэдээ татан авах ажлыг эхлүүлээд байна. 

Мягмар гарагт Казахстаны эрх баригчид Израилд байсан 100 гаруй иргэнийхээ зэрэгцээ гадаадын иргэдийг аюулгүй газарт татан авахаар тусгай онгоц илгээсэн бол энэ удаад Германы агаарын тээврийн компани нүүлгэн шилжүүлэх тусгай нислэг гүйцэтгэхээр болжээ. 

ХБНГУ-ын Гадаад хэргийн яамны мэдэгдсэнээр, Израил дахь нөхцөл байдал хурцадсаны улмаас Германы иргэдийг Израилаас нүүлгэн шилжүүлэх тусгай үүргийн нислэгийг Люфтханза агаарын тээврийн компани гүйцэтгэхээр болсон байна. 

Тодруулбал, 10 дугаар сарын 12, 13-ны өдрүүдэд тус бүр дөрөв, нийт найман нислэг үйлдэж иргэдээ татан авах аж. Израилд чухам хичнээн иргэн нь байгаа талаарх нарийн мэдээлэл байхгүй тул Израилаас явах хүсэлтэй иргэдийг нэн даруй консул, элчин сайдын яамтайгаа холбоо барихыг Германы Гадаад хэргийн яам уриалжээ. 

Израилаас иргэдээ нүүлгэн шилжүүлэх ажлыг Польш, Энэтхэг, Литва, Болгар гэсэн орнууд хэдийнэ эхлүүлсэн. Мөн Канад улс ч иргэдээ нүүлгэн шилжүүлэх ажил төлөвлөсөн гэж тус улсын Гадаад хэргийн яам мэдэгдэж байв.

Г.Бямбасүрэн