Өнгөрсөн амралтын өдрүүдэд эхэлсэн Палестин, Израилын сөргөлдөөний улмаас Израилд байсан дэлхийн олон орны иргэд амиа алдаж, сураггүй болж, гэмтэж бэртсэн байна.
Эдгээр хүмүүсийн дунд БНХАУ-ын иргэд ч багтаж байгаа бөгөөд БНХАУ-ын гурван иргэн шархдаж, дөрвөн иргэн ор сураггүй болсонд тооцогдож байгаа аж. Үүнтэй холбоотойгоор БНХАУ-ын Израил дахь Элчин сайдын яам мэдэгдэл гаргаж, Израилд байгаа иргэдээ нэн сэрэмжтэй байж, онц нөхцөл байдал үүссэн нөхцөлд дипломат төлөөлөгчийн газартай нэн даруй холбогдохыг анхааруулсан байна.
Түүнчлэн БНХАУ-ын Гадаад хэргийн яам Палестин, Израилын сөргөлдөөний талуудыг тэвчээртэй байж, нэн даруй гал зогсоохыг уриалжээ. Мөн энэ мэдэгдэлд хоёр улс зэрэгцэн орших, хараат бус Палестины улс байгуулах тухай шийдвэрийг хэрэгжүүлэх нь Палестин, Израилын сөргөлдөөнийг шийдэх гол арга зам хэмээн цохон тэмдэглэсэн байна.
Энд дуулгахад, 10 дугаар сарын долооны өглөө Израил улс Газын зурвасын зүгээс их хэмжээний пуужингийн цохилтод өртсөн юм. Түүнчлэн ХАМАС-ын дайчид Израилын өмнөд зүгт нэвтрэн орж, сөргөлдөөнийг өдөөсөн юм. Үүний хариуд Израил Газын зурваст ажиллагаа эхлүүлж, Израилд дайны байдал албан ёсоор зарласны дээр дайчилгаа эхлүүлсэн байна.
Г.Бямбасүрэн
| Уншиж байна |