Эрдэнэт үйлдвэр ТӨҮГ-ын ажилчид ажил хаясантай холбогдуулан МҮЭХ-ноос өнөөдөр мэдээлэл хийлээ.

МҮЭХ-ны Ерөнхийлөгч С.Эрдэнэбат “Уулын баяжуулах Эрдэнэт үйлдвэрийн Үйлдвэрчний холбоо өнгөрсөн хоёр сард бага хурал хийж, би энэ хуралд оролцсон. Нийт 7000 орчим ажилтныг төлөөлсөн 1000 орчим хүн оролцсон. Эрдэнэт үйлдвэрийн ажилчдын цалин сүүлийн 10-аад жилд инфляцийг нөхөх төдий, 10 орчим хувиар нэмэгдэж ирсэн. Эрдэнэт үйлдвэрийн ажилчид одоо инфляцийн түвшин дээр нэмээд бодит цалингийн нэмэгдэл шаардлагатай байгааг хэлж байна.

Үүний дагуу хамтын гэрээнд нэмэлт оруулах санал, шаардлагыг тавьж, зөвшилцөлд хүрээгүй учраас өнөөдөр өглөөнөөс хэсэгчлэн ажил хаялт зарлалаа. МҮЭХ-ноос хуульчдын багийг явуулсан.

Захиргааны зүгээс мэдээлэл зөрүүтэй байна гэж харж байна. Үйлдвэрийн Ерөнхий захирал мэдэгдэл хийж, цалинг гурван жил дараалан 15 хувиар нэмье гэсэн боловч Үйлдвэрчний эвлэлээс 50 хувь гэсэн хатуу шаардлага тавьсан гэх мэдээллийг олон нийтэд өглөө. Үйлдвэрийн үйлдвэрчний эвлэлээс мэдээлэл авахад “захиргааны зүгээс шийдвэр гаргах түвшний хүмүүс оролцохгүй, судалъя, өвчтэй, чөлөөтэй зэргээр хамтын гэрээ байгуулах процессыг удаашруулж, зөвшилцөлд хүрээгүй учраас ажил хаясан” гэсэн тайлбарыг өгсөн.

Үйлдвэрийн захиргааны зүгээс цалинг 15 хүртэл хувиар нэмэх боломжтой гэсэн байна. Хүртэл гэдэг нь 1, 2, 5 хувь ч байж болно. Тиймээс Үйлдвэрчний эвлэлээс инфляцин түвшин дээр нэмээд ажлын ачааллыг тооцож цалинг 30- 50 хүртэл хувиар нэмэгдүүлэх шаардлага тавьсан.

Захиргааны ажилчдын цалинг 15 хувиар нэмж болно. Үйлдвэрийн үйл ажиллагааг нуруундаа үүрч байгаа, ачаалал ихтэй ажилчдын цалинг 50 хүртэл хувиар нэмээч гэж байгаа.

Эрдэнэт үйлдвэрийн ажилчдын дундаж цалин 4 сая төгрөг гэж хэлсэн. Гэхдээ энэ нь захиргаа болоод үйлдвэрийн бүх ажилчдын дундажаар тооцсон цалин. Үйлдвэрийн захирал, удирдлагууд 40-50 сая төгрөгийн цалин авдаг гэх мэдээлэл бий.

Үйлдвэрийн чухал мэргэжлийн ажилчид, тэр дундаа хариуцлага, ачаалал өндөртэй ажилчдын цалинг илүү нэмэх шаардлагыг МҮЭХ дэмжиж байгаа. Ажилчдынхаа дундаж цалингаас 5, 10 дахин илүү цалин авдаг цалингийн системийг өөрчлөх цаг нь болсон.

Эрдэнэтийн зэс дэлхийн зах зээлийн үнээр зарагддаг. Гэвч бид дэлхийн хэмжээний цалинг шууд өнөөдөр авъя гэж хэлээгүй. Аажмаар энэ түвшинд хүргэх саналыг тавьсан. Энэ асуудалд зөвшилцөх бүрэн боломжтой” хэмээн Эрдэнэт үйлдвэрийн ажилчдын шаардлагыг дэмжиж байгаагаа илэрхийллээ.

Мөн тэрбээр хамтын хэлэлцээрт хэлтэс, тасгийн дарга биш үйлдвэрийн удирдлага, шийдвэр гаргах түвшний хүмүүс оролцох хэрэгтэй. Ерөнхий захирал Г.Ёндон өөрөө оролцсон шинэ бүрэлдэхүүн томилж, хэлэлцээгээ дахин эхлүүлэхийг уриаллаа. 

Б.Хэрлэн