2023 оны эхний хагас жилд Хятадын ухаалаг утаснууд Оросын зах зээл дээр давамгайлсан дүнтэй гарчээ. Энэ талаар "М.Видео-Эльдорадо" компаниас хийсэн судалгаанд өгүүлсэн байна. 

Судалгааны дүнгээр, 2023 оны эхний хагаст Оросын зах зээлд борлуулагдсан нийт гар утасны 70 хувь нь Хятадад үйлдвэрлэгдсэн ухаалаг утаснууд байсан аж. Өнгөрсөн онд энэ үзүүлэлт 55 хувьтай байжээ. Харин 2023 оны эхний зургаан сард 13 сая ухаалаг утас борлуулагдсан байна. 

Түүнчлэн өнгөрсөн оны мөн үетэй харьцуулахад нийт эрэлт 17 хувиар өссөн бол гар утасны дундаж үнэ 16 хувиар буурчээ. Судалгаанд өгүүлснээр, Орост хамгийн борлуулалттай 10 ухаалаг утасны брэндийн найм нь Хятадынх аж. Тэр дундаа Xiaomi, Realme утаснууд борлуулалтаараа тэргүүлсэн бол гуравдугаарт Samsung, дөрөвдүгээрт Apple бичигджээ.

Г.Бямбасүрэн