БНХАУ-ын эрх баригчид галли, германи гэсэн ховор металлын экспортыг хязгаарлахаар болжээ. Энэ талаар Жэнминь жибао сонин мэдээлсэн байна. 

Эх сурвалжийн мэдээлснээр, микросхем болон бусад электрон эд ангийг үйлдвэрлэхэд ашиглагддаг галли, германи болон эдгээр металл агуулагдсан төрөл бүрийн нэгдлүүдийг экспортлохыг хязгаарлахаар болжээ. Энэ шийдвэр 2023 оны наймдугаар сарын нэгний өдрөөс эхлэн хүчин төгөлдөр болох аж. Ингэснээр галли, германи металл нийлүүлэгч компаниуд экспортод гаргахын тулд тусгай зөвшөөрөл авах бөгөөд зөвшөөрөл авах хүсэлтэд ямар зорилгоор, ямар байгууллагад металл нийлүүлэх талаар тусгах ёстой болжээ. 

Хятад улс галли, германи металлын хамгийн том үйлдвэрлэгч бөгөөд галли металлын дэлхийн нийт үйлдвэрлэлийн 95 хувь, германи металлын 67 хувь нь БНХАУ-д оногддог.  Эдгээр металлын нийлүүлэлтийг хязгаарлах болсон нь  АНУ-ын үйлдэлтэй холбоотой гэж шинжээчид үзэж байна. Учир нь АНУ Хятадын компаниудын эсрэг удаа дараа хориг тавьж, тэпгээр компанийг Америкийн технологи, тоног төхөөрөмж худалдан авахыг хориглосон юм.

Г.Бямбасүрэн