Бразилийн үндэсний шигшээ багийн довтлогч Неймар эзэмшдэг газар дээрээ газар шорооны ажил хийлгэснийхээ төлөө асар өндөр торгуулд унажээ. Энэ талаар The Mirror мэдээлсэн байна. 

Эх сурвалжийн мэдээлснээр, Мангаратиб хотын эрх баригчид Неймарыг эзэмшдэг газар дээрээ цөөрөм, усанд шумбах хэсэг ухсан хэргээр 16 сая реал буюу 3,3 сая доллартай тэнцэх мөнгөөр торгох шийдвэр гаргажээ. Неймарыг усан сан байгуулах үедээ экологийн хяналт тавиагүйн улмаас газарт ургамлын бүрхэвч устаж, хөрсний бүтэц эвдэрсэн хэмээн буруутгасан байна. Үүний зэрэгцээ нутгийн голоос зөвшөөрөлгүйгээр ус авч ашигласан хэмээн буруутгажээ. 

Улмаар хотын эрх баригчид цөөрөм, шумбах хэсгийг ашиглахыг хориглон, цөөрмийн гадуур хязгаарлах тууз татсан байна. Гэвч үүнээс хэдхэн хоногийн дараа Неймар хоригийг үл хайхран цөөрөмд сэлж байгаа зургаа олон нийтийн сүлжээнд оруулжээ. Одоо тэрбээр эрх баригчдын шийдвэрийг давж заалдахад 20 хоногийн хугацаа үлдсэн аж.

Г.Бямбасүрэн