Долдугаар сарын гуравны даваа гарагт Японы нийслэл Токио хотын төвд байх нэгэн зоогийн газарт дэлбэрэлт болжээ. Энэ талаар Японы NHK суваг дамжуулсан байна. 

Эх сурвалжийн мэдээлснээр, дэлбэрэлт болсон зоогийн газар нь төвийн Минато дүүргийн найман давхар барилгын хоёрдугаар давхарт байрладаг аж. Дэлбэрэлтийн улмаас зоогийн газрын гурван ажилтан, гудамжинд зорчиж явсан нэг хүн гэмтсэн бөгөөд тэдний гэмтлийн зэрэг хөнгөн гэж эх сурвалж мэдээлсэн байна. 

Найман давхар барилгын хоёрдугаар давхарт байрлах зоогийн газар дэлбэрэлт болсны дараа гал гарчээ. Энэ гал түймрийг гал сөнөөгчид цаг орчим ажиллаж унтраасан байна.

Дэлбэрэлт болсон шалтгаан нь хий алдагдсантай холбоотой гэсэн урьдчилсан таамаглал гарчээ. "Тамхины өрөөнд тамхи татахаар асаагуураа асаахад тэр дороо дэлбэрсэн" хэмээн зоогийн газрын менежер ярьжээ.

Гэрчүүдийн өгүүлснээр, барилгад хий үнэртэж байсан гэнэ. Улмаар хий алдагдсан үед асаагуур асааснаар дэлбэрэлт болсон гэж үзэж байгаа аж.

Г.Бямбасүрэн