Францад зургадугаар сарын 27-ны өдөр цагдаагийн алба хаагч 17 настай хүүг буудан хөнөөснөөс үүдэлтэй эсэргүүцэл эмх замбараагүй байдлаар үргэлжилж, зургаа хоногийн туршид энэ улсын томоохон хотуудад үймээн дэгдсээр байна. 

Энэ үймээний үеэр Хятадын жуулчид халдлагад өртсөн хэрэг гарчээ. SCMP сонины мэдээлснээр, зургадугаар сарын 29-ний өдөр Хятадын 41 жуулчин сууж явсан автобус руу үймээн дэгдээгчид халдсан байна. Жуулчны автобус зорчин явах үед эсэргүүцэгчид автобусны цонхыг хагалжээ. Энэ хэргийн улмаас зургаан жуулчин хөнгөн гэмтсэн байна. 

Халдлагад өртсөн жуулчид орон нутгийн цагдаагийн хэлтэст хандаж, мөн энэ хэрэгтэй холбоотойгоор Марсель дахь Хятадын Ерөнхий консулын газар Францын талд албан ёсоор гомдол илгээжээ. Түүнчлэн Хятадын Консулын газар өөрийн улсын жуулчдад хандан үймээн дэгдэж буй бүс нутгаар аялахгүй байх, аюулгүй байдлын арга хэмжээнд анхаарахыг зөвлөсөн байна. 

Г.Бямбасүрэн