Америкийн Хүнсний бүтээгдэхүүн, эм бэлдмэлийн чанарын хяналтын газар Илон Маскийн Neuralink компанид хүмүүс дээр тархины имплант турших зөвшөөрөл өгчээ. Энэ талаар NBC мэдээлсэн байна. 

Америкийн тэрбумтан Илон Маск имплантыг хүний тархинд суулган турших зөвшөөрлийг гурван жил хүлээсэн юм. Хүний тархинд чип суулган турших төслийнхөө талаар тэрбээр 2019 онд анх танилцуулж байлаа. Харин 2022 оны эхээр Илон Маскийн компанийн гаргасан хүсэлтийг хүлээн аваагүй юм. 

Имплантын аюулгүй байдалтай холбоотойгоор хуульчид болгоомжилж байсан бөгөөд эцэст нь ийнхүү дэмжжээ. Хэдийгээр Илон Маскийн компани энэ зөвшөөрлийг авсан ч яг одоогоор эмнэлзүйн туршилт хийхэд бэлэн биш байгаа гэнэ. 

Маскийн өгүүлснээр, компьютер болон хүний тархины хооронд шууд холбоо тогтоох нь төслийн эцсийн зорилго бөгөөд энэ технологийн ачаар хөгжмийг хүний тархи руу шууд дамжуулах, эсвэл хүний гормоны түвшнийг зохицуулах боломжтой болох аж. Түүнчлэн энэ чип түгшүүрийн мэдрэмжийг арилгаж, эсвэл аливаа бодол санаанд төвлөрүүлэх боломжийг олгож, окситоцин, серотонин болон бусад химийн бодисуудыг гаргах явцыг дэмжих гэнэ. Энэ бүтээлийн тусламжтайгаар тархины гэмтэлтэй хүмүүсийн үе мөчний хөдөлгөөнийг сэргээх боломжтой болно гэдгийг Илон Маск онцолж байв. 

Г.Бямбасүрэн