ОХУ-ын Ерөнхий сайд Михаил Мишустин тавдугаар сарын 23-24-ний өдрүүдэд Хятадад албан ёсны айлчлал хийсэн. Энэ үеэр хоёр орны эдийн засгийн харилцааг өргөжүүлэх, Барууны орнуудын хоригтой тэмцэхэд Бээжингээс шинээр тусламж авах үүрэг авсан Мишустин зорилгодоо хүрч чадаагүй гэж Ведомости мэдээлжээ. 

Эх сурвалжийн мэдээлснээр, БНХАУ-ын сайд нар болон Хятадын томоохон компаниудын захирлууд барууны орнуудын хориг арга хэмжээний жагсаалтад орсон Оросын албан тушаалтнууд, төрийн компаниудын захирлуудтай уулзахаас татгалзсан гэнэ. 

"Хятадууд найрсгаар угтан авсан ч хоригоос айж байсан. Форумын үеэр олны өмнө илтгэл тавихаар бэлдэж байсан томоохон бизнесменүүд ч төлөвлөгөөнөөсөө татгалзсан" хэмээн Шанхайн форумыг зохион байгуулагчдад ойр эх сурвалж өгүүлсэн байна. Энэ форумд Мишустиний тэргүүлсэн Оросын төлөөлөгчид оролцсон юм.

Өөр нэг эх сурвалжийн өгүүлснээр, хятадууд хоригт орохоос эмээж байгаа нь олон зүйл дээр илэрч байсан гэнэ. Тухайлбал, Шанхайн валют солих цэгт Оросын төлөөлөгчдийн багийн нэгэн гишүүн 100 долларыг юань болгон солиулах гэхэд татгалзсан хариу өгчээ. Энэ хүн хориг арга хэмжээнд багтсан бизнесмен байсан гэнэ.

Г.Бямбасүрэн