Форбс сэтгүүл жил бүр гаргадаг дэлхийн хамгийн чинээлэг хүмүүсийн жагсаалтыг тэргүүлсэн Бернар Арно ганцхан өдрийн дотор 11,2 тэрбум доллар алджээ. Энэ талаар Блүмберг агентлаг мэдээлсэн байна. 

Эх сурвалжийн мэдээлснээр, LVMH-ийг үндэслэгч Бернар Арно тавдугаар сарын 23-ны өдөр Парисын бирж дээр компанийнх нь хувьцаа таван хувиар унасны улмаас 11,2 тэрбум доллар алдсан байна. АНУ-ын эдийн засаг суларч байгаа нь тансаг зэрлэглэлийн бүтээгдэхүүний эрэлт буурч болзошгүй гэсэн болгоомжлол гарсантай холбоотойгоор  LVMH-ий хувьцаа унажээ. 

Блүмберг агентлагаас гаргадаг тэрбумтнуудын индексийн мээдэллээр, тавдугаар сарын 23-ны үдэш Бернар Арногийн хөрөнгө 191,6 тэрбум доллар болсон байна. LVMH компанид Louis Vuitton, Moet & Chandon, Christian Dior зэрэг тансаг зэрэглэлийн брэндүүд хамаардаг юм. Сүүлийн нэг жилд энэ компанийн хувьцаа 23 хувиар өсөж байв. Тиймдээ ч Бернар Арног дэлхийн хамгийн баян хүн болсон гэж Блүмберг, Форбс сэтгүүлүүд мэдээлж байлаа. Түүний хөрөнгө жилийн дотор 53 тэрбум доллараар өссөн байна. 

Г.Бямбасүрэн