Францын эрх баригчид нүүрстөрөгчийн давхар исэл агаар мандалд хаягдах байдлыг бууруулах зорилгоор ойрын зайн бүхий л дотоодын нислэгийг хоригложээ. Энэ талаар ВВС агентлаг мэдээлсэн байна. 

Эх сурвалжийн мэдээлснээр, галт тэргээр 2,5 цагийн хугацаанд туулах боломжтой чиглэлүүдэд агаарын нислэг үйлдэхийг хориглох саналыг Францын хууль тогтоогчид хоёр жилийн өмнө дэмжиж байжээ. Харин одоо албан ёсоор хориглосноор, хоорондоо 437 км зайтай Парис-Нант хотыг холбосон чиглэл, 556 км зайтай Лион-Бордо чиглэлд нислэг үйлдэх боломжгүй болсон байна.

Нүүрсхүчлийн хаягдлыг бууруулах зорилгоор гаргасан энэ шийдвэрийг нисэхийн салбарынхан шүүмжлэлтэй хүлээн авчээ. Тухайлбал, Airlines for Europe группийн тэргүүний үүрэг гүйцэтгэгч Лоран Донсель AFP агентлагт ярилцлага өгөхдөө ойрын зайн нислэгүүдийг хориглосон нь СО2 хаягдлыг бууруулахад багахан нөлөө үзүүлнэ хэмээн онцолсон байна. Нислэг хориглохын оронд энэ асуудалд илүү бодитой хандаж, арга хэмжээ авах шаардлагатай байсан гэж тэрбээр Францын эрх баригчдыг шүүмжилжээ. 

Г.Бямбасүрэн