Украинд өдүүлсэн дайнаас үүдэлтэй хориг арга хэмжээний хүрээнд Оросын алмазыг гүйлгээнд оруулах худалдааны ажиллагааг Европын холбоо хязгаарлахаар төлөвлөж байгаа гэнэ. Энэ талаар Европын зөвлөлийн дарга Шарль Мишель тавдугаар сарын 19-ний өдөр мэдэгдсэнийг DW агентлаг дамжуулжээ. 

"Бид Оросын алмазны худалдааг хязгаарлана. Оросын алмаз мөнх биш" хэмээн Японы Хирошима хотод, G7 дээд хэмжээний уулзалт болохын өмнө зохион байгуулагдсан хэвлэлийн хурал дээр Шарль Мишель мэдэгдсэн байна.

Европын холбооны гишүүн орон болох Бельги улс Энэтхэг, Арабын зэрэгцээ Оросын алмазыг авдаг томоохон худалдан авагчдын нэг юм. Харин АНУ бэлэн бүтээгдэхүүний хангамжийн эцсийн үндсэн зах зээл болдог аж. 

Оросын эсрэг тавих шинэ хоригийн хүрээнд Оросын алмазын импортыг хориглох талаар өмнө нь Их Британи зарласан. Түүнчлэн Оросоос зэс, хөнгөн цагаан, никель худалдан авахыг хориглосон байна.

Г.Бямбасүрэн