Тавдугаар сарын 18-нд Францад эхэлсэн Каннын кино наадам үргэлжилж байна. Энэ наадмын хүндэт шагналыг Америкийн жүжигчин Харрисон Форд хүртсэн талаар France Press агентлаг мэдээлжээ. 

Америкийн нэрт жүжигчин Харрисон Форд Каннын кино наадмын  "Алтан дал модны мөчир" шагналын эзэн болсон байна. Жүжигчинд энэ шагналыг гардуулах талаар өмнө нь мэдээлэл гарч байгаагүй тул энэ нь гэнэтийн үйл явдал болсон гэж эх сурвалж мэдээлжээ. 

Харрисон Форд "Индиана Жонс ба Хувь тавилангийн дугуй" нэртэй киног Каннын наадамд танилцуулахаар ирсэн байна. 

"Би энэхүү шагналыг хүртсэндээ ихээхэн сэтгэл хөдөлж байна" хэмээн 80 настай жүжигчин өгүүлээд цаашид Индиана Жонсын тухай кинонд тоглохгүй хэмээн мэдэгджээ.

Энд дуулгахад, 76 дахь удаагийн Каннын кино наадам тавдугаар сарын 18-ны өдөр Францад эхэлсэн, энэ сарын 27-ныг хүртэл үргэлжлэх юм. Үндсэн уралдаанд Уэс Андерсоны "Астероидуудын хот", Жессика Хаузнерын "Зеро клуб", Вим Вендерсийн "Гайхалтай өдрүүд" зэрэг нийт 21 кино өрсөлдөх аж.

Г.Бямбасүрэн