Их Британид жолоочгүй автобусны анхны чиглэлийг нээжээ. Гэхдээ автобус дан автоматаар ажиллана гэсэн үг биш, бүхээгт жолооч байх бөгөөд онц байдал үүссэн нөхцөлд жолооч автобусыг жолоодох аж. 

Шинэ чиглэл нь Эдинбургийн бүсэд, 22 км замыг туулж, долоо хоногт 10 мянган зорчигч тээвэрлэхээр тооцоолжээ. Эхний ээлжинд таван автобусыг энэ чиглэлд явуулах юм байна. Жолоочгүй автобуснууд 80км/цаг хүртэлх хурдтайгаар явж, автобусны бүхээгт жолооч сууж явах аж. Их Британийн хуульд одоогоор бүрэн автомат тээврийн хэрэгслийг зөвшөөрөөгүй тул жолооч байх бөгөөд гэхдээ автомат горим дээр байгаа үед жолооч оролцохгүй, гагцхүү онц байдал үүссэн нөхцөлд жолоодлогыг гартаа авах юм байна.

Жолоочгүй автобусны бүхээгийн систем нь мөргөлдөхөөс зайлсхийхийн тулд замын хөдөлгөөний бусад оролцогчдыг хардаг, харин камер болон радар нь зам дээр явган хүн байгаа эсэхийг хянадаг гэнэ. Хиймэл оюун ухааны механизм нь мэдээлэл цуглуулж, автобусыг хүрэх цэг рүү хамгийн аюулгүй чиглэлээр аваачих замыг тогтоодог аж.