China Youth Daily сэтгүүлээс 18-24 насны 200 мянган хүний ​​дунд явуулсан судалгаагаар хятад залуусын 60 гаруй хувь нь бусадтай харилцахад бэрхшээлтэй, түгжигдсэн мэт амьдралын хэв маягтай хэмээн хариулжээ. Харин нийт санал асуулгад оролцогчдын дөнгөж 30 хувь нь нийгмийн харилцаанд ямар ч бэрхшээл тулгараагүй гэж хариулсан байна. 

Нийт  судалгаанд хамрагдсан залуусын 50 гаруй хувь нь ажил, амьдралдаа маш их стрессэнд орсон тул нийгмийн харицаанд идэвхгүй, эрч хүчгүй байдаг хэмээн дурдсан байна. 

Хятадад гучаад жилийн өмнөхөн л хүн бүр шаргуу хөдөлмөрлөж, хүүхэдтэй болон гэр бүл зохиох нь хамгийн сайхан амьдрал гэсэн үзэл дэлгэрч байв. Өмнөх үеийнхний шаргуу хөдөлмөрийн үр дүнд олон мянган хүн ядуурлаас гарч урд хөрш маань сэргэн мандсан билээ. Гэтэл одоо цагт ажлын цаг нэмэгдэж, орон сууцны үнэ хурдацтайгаар өсөж буй нь шинэ үеийн залууст сэтгэл зүйн дарамт учруулж, тэд аав ээжээсээ илүүг бүтээж чадалгүй бүтэлгүйтэх анхны үеийнхэн болно гэдгээсээ эмээж буй хэмээжээ. Тиймээс залуучууд урт хугацаанд үргэлжилсэн эх орныхоо хөгжил цэцэглэлтийн явцад гар бие оролцохоос татгалзаж буйгаа илэрхийлсэн байна. 

Ухань хотын коллеж төгсөгч Лю Жин Өөрийгөө танихгүй хүмүүст танилцуулах, эвгүй уур амьсгалыг эвдэхээс үнэхээр эвгүй байгаагаа хэлээд "Би танихгүй хүнтэй уулзахдаа эхлээд үг хэлэхээс зайлсхийдэг. Залуус дуртай зүйлийнхээ төлөө л шаргуу хөдөлмөрлөх эрхтэй. Тэрнээс биш хэн нэгний хүслийг биелүүлж, эдийн засгийн өсөлтөд нэмэр болох эрэг шурга байх албагүй. Ихэнх албан байгууллага 996 буюу өглөө 9 цагаас орой 9 цаг хүртэл долоо хоногийн 6 өдөр ажиллахыг шаарддаг нь байж боломгүй зүйл. Бидэнд дуртай зүйлээ хийх цаг хэрэгтэй. 

Бээжинд төгсөх ангийн оюутан Рэн Вэн "Би онлайнаар харилцахад ямар  бэрхшээл гардаггүй хэдий  ч олон хүнтэй газар байхдаа хүмүүстэй харилцаанд орохн нь битгий хэл, урдаас нь харахад хүртэл хэцүү болдог. Амьдралын удаан хэмнэлийг сонгох эрх надад бий. Би нийгэмд ямар нэгэн хор хөнөөл учруулаагүй шүү дээ. Заавал бүгдээрээ 12 цаг зогсоо зайгүй ажиллах ёстой юм уу?" гэв. 

Нанкай их сургуулийн профессор Гуан Жиан хэлэхдээ, цахим харилцаа холбоо, онлайн хуваалцах нь залуу үеийнхний өдөр тутмын амьдралын нэг хэсэг болжээ. Коронавирус бидэнд нэг талаараа маш том сургамж төдийгүй олон гайхалтай боломжийг бий болгосон. Харин нөгөө талаараа хүмүүсийн бодит харилцаа тогтоох хүсэл байхгүй болж сэтгэл гутралын түвшин нэмэгдсэн нь харамсалтай" хэмээсэн юм. 

Ц.Наранцацрал