"Ндрангета" мафийн бүлэглэлийн эсрэг томоохон ажиллагаа явуулж, 100 гаруй гишүүнийг нь баривчилжээ. Баривчилгаа Италид төдийгүй Баруун Европын бусад орнуудад явагдсан гэж МИР24 суваг мэдээлсэн байна. 

Эх сурвалжийн мэдээлснээр, "Ндрангета" мафийн эсрэг тусгай ажиллагаа явуулж, 108 хүнийг баривчилжээ. Тэдний ихэнхийг Итали болон Германаас баривчилсан бол бусад нь Бельги, Франц, Испани, Португалид баривчлагдсан байна. Мафийн гишүүдийг хар тамхины наймаа, хүний амь хөнөөсөн, мөнгө угаасан болон луйвар хийсэн хэрэгт буруутгаж байгаа аж.

"Дэлхий даяар үйл ажиллагаа явуулдаг, хүчирхэг, нөлөө бүхий гэмт хэргийн бүлэглэл болох Италийн "Ндрагента" мафийн бүлэглэлд бид өнөө өглөө хүчтэй цохилт өгч чадлаа. Томоохон дэлгүүрүүд, гэр оронд нь нэгжлэг хийсэн" хэмээн Германы Хойд Рен-Вестфалийн Дотоод хэргийн сайд  Герберт Ройл мэдэгдсэн байна.

Сүүлийн жилүүдэд энэ хүчирхэг гэмт хэргийн бүлэглэлийн гишүүдийг эрэн сурвалжлах, баривчлах ажил тасралтгүй явагдаж байгаа юм. Улмаар "Ндрагента" бүлэглэлийн 100 гаруй гишүүнд ял оноож, хорьсон байна.

"Ндрагента" мафи нь дэлхийн хамгийн чинээлэг, хүчирхэг мафид тооцогддог. Дээрэм, тонуул, хүн барьцаалах, хар тамхины наймаа зэрэг гэмт хэргүүдийг энэ бүлэглэлийнхэн ХХ зууны дунд үеэс л хийж эхэлжээ. Энэ бүлэглэл Европ дахь кокаины эргэлтийн 80 хувийг хянадаг гэлцдэг. Энэ бүлэглэлийнхэн "Коза ностра", "Каморра" зэрэг бүлэглэлээс ялгаатай нь энэ бүлэглэлийн гишүүд хууль сахиулагчидтай хамтран ажиллахыг зөвшөөрсөн тохиолдол бараг гарч байгаагүй аж. Тиймээс энэ бүлэглэлийн талаарх мэдээлэл хомс байдаг аж. "Ндрагента" мафид "ямар ч нөхцөлд бүлэглэлийн талаар ярихгүй байх " гэсэн хууль үйлчилдэг гэнэ. Ам нээсэн бол мафийн хуулийн дагуу хэрцгийгээр хөнөөдөг, тиймээс тэднийг баривчлах, гэм бурууг нь батлахад хүндрэлтэй байдаг гэж Италийн хууль сахиулагчид өгүүлжээ.

Г.Бямбасүрэн