Москвад дрон хөөргөхийг хориглосон талаарх мэдээлэл тавдугаар сарын гуравны өдөр гарч байсан. Үүний араас, Ялалтын баярын парадын үеэр Новосибирск хотод нисэгчгүй нисэх аппарат ашиглахыг хоригложээ.  

"Парадын үеэр аливаа нисэгчгүй нисэх аппарат ашиглахыг хориглоно. Тэр дундаа хэвлэл мэдээллийн хэрэгслүүд зураг авалт хийхээр дрон ашиглахыг хориглоно, зөвшөөрөл олгохгүй" хэмээн Новосибирскийн эрх баригчид мэдэгджээ. Энэ нь аюулгүй байдлын арга хэмжээтэй холбоотой хэмээн тайлбарласан байна. 

Новосибирск хотноо болох Ялалтын парадыг үзэхээр  10 мянга  орчим хүн ирнэ гэж тооцоолж байгаа аж. Парад орон нутгийн цагаар тавдугаар сарын есний өдөр 10:00 цагт эхэлж, нэг цаг орчим үргэлжлэх юм байна. 

Энд дуулгахад, Оросын зарим бүс нутаг 2022 оны намраас эхлээд дрон ашиглахыг хориглосон. Харин өнгөрсөн лхагва гарагт Кремль рүү дронууд довтолсны дараа нисэгчгүй нисэх аппарат ашиглахыг хориглох шийдвэрүүд дахин ар араасаа гарч байгаа юм. Тухайлбал, Москва, Санкт-Петербург хот, Москва муж, Ленинград мужид дрон нисгэхийг хоригложээ. 

Г.Бямбасүрэн